ایلون مسک کے بیٹے نے تقریب کے دوران صدر ٹرمپ کو پریشان کر دیا،سوشل میڈیا پر تنقید

(ویب ڈیسک) امریکی صدر کے واشنگٹن  کے اوول آفس میں ایک منفرد اور دلچسپ واقعہ اس وقت پیش آیا جب امریکی صدر ڈونلڈ ٹرمپ ایک ایگزیکٹو آرڈر پر دستخط کر رہے تھے۔ اس موقع پر ایلون مسک بھی موجود تھے، جن کے ہمراہ ان کا چار سالہ بیٹا بھی تھا، جس نے اپنی معصوم حرکات سے صدر ٹرمپ کو قدرے پریشان کر دیا۔جس پر صدر نے ناپسندیدگی کا اظہار کرتے ہوئے چہرہ پھیر لیا۔

رپورٹ کے مطابق تقریب کے دوران جب ایلون مسک میڈیا سے گفتگو کر رہے تھے تو ان کا بیٹا نہ صرف اپنی ناک صاف کرنے میں مصروف تھا بلکہ صدر ٹرمپ سے بات بھی کر رہا تھا۔ ایک لمحے پر صدر ٹرمپ نے بچے کو ’بہت ذہین اور شاندار لڑکا‘ قرار دیا، تاہم بعد میں جب بچے نے کچھ اور کہا تو صدر نے ناپسندیدگی کا اظہار کرتے ہوئے چہرہ پھیر لیا۔ پھر جیسے ہی بچے نے دوبارہ کوئی جملہ کہا، ٹرمپ نے ہاتھ بڑھا کر اسے خاموش کرانے کی کوشش کی۔

اس حوالے سے سوشل میڈیا پر صارفین نے ایلون مسک پر تنقید کی کہ وہ اپنے بیٹے کو سیاسی تقریبات میں لے جا رہے ہیں اور بعض لوگوں نے اسے ’سیاسی حربہ‘ قرار دیا۔ اس موقع پر ایلون مسک کی جانب سے ’میگا‘ ٹوپی پہننا بھی تنازعے کا باعث بن گیا  کیونکہ وفاقی قوانین کے مطابق سرکاری ملازمین کو ایسی سیاسی سرگرمیوں میں ملوث ہونے کی اجازت نہیں ہے۔ اس کے علاوہ ایلون مسک کو وفاقی عدالتوں میں بھی مشکلات کا سامنا ہے۔ امریکی ڈسٹرکٹ جج کارل نکولس نے حکومت کے اس حکم کو روک دیا ہے جس کے تحت یو ایس ایڈ کے بیرون ملک تعینات ملازمین کو 30 دن میں امریکہ واپس بلانے کا کہا گیا تھا۔جج پال اے اینگل مائیر نے مسک کے قائم کردہ ’ ڈپارٹمنٹ آف گورنمنٹ ایفیشنسی’ کو محکمہ خزانہ کے حساس ڈیٹا تک رسائی سے روک دیا۔ اس ڈیٹا میں لاکھوں امریکیوں کے سوشل سیکیورٹی نمبرز اور بینک اکاؤنٹس کی تفصیلات شامل تھیں۔یہ واقعات ظاہر کرتے ہیں کہ ایلون مسک اور صدر ٹرمپ کو نہ صرف عوامی بلکہ قانونی سطح پر بھی سخت چیلنجز کا سامنا ہے۔

یہ بھی پڑھیں: پنجاب کے تمام سرکاری سکولوں میں سالانہ امتحانات 10 مارچ سے لئے جائیں گے