بلوچستان کا افسوسناک واقعہ حکومت کی ناکام پالیسیوں کا نتیجہ ،اسد قیصر نے شدید تشویش  کا اظہار کردیا

(انوارلحق ) پی ٹی آئی کے رہنما اور سابق سپیکر قومی اسمبلی اسد قیصر نے بلوچستان میں پیش آنے والے افسوسناک واقعے پر شدید تشویش  کا اظہار کرتے ہوئے کہا ہے کہ بلوچستان کا واقعہ حکومت کی ناکام پالیسیوں کا نتیجہ ہے۔

سابق سپیکر قومی اسمبلی اسد قیصر  نےکہا ہے کہ بلوچستان اور خیبر پختونخوا میں حکومتی رٹ ختم ہو چکی ہے، سندھ  میں کچے کے ڈاکو کی وجہ سے امن و امان کی صورتحال بدترین ہو چکی ہے، بلوچستان اسمبلی کے اکثر نمائندے عوامی مینڈیٹ کے حامل نہیں، بلوچستان کے نمائندے جعلی مینڈیٹ پر اقتدار میں بیٹھے ہیں، ذاتی انا اور پسند نا پسند کی وجہ سے بلوچستان کے حقیقی نمائندوں کو اسمبلی سے باہر رکھا، حکمران اپنی ناکام پالیسیاں فوری تبدیل کریں۔

پی ٹی آئی رہنما نے کہا کہ ایران اور افغانستان کے ساتھ ہماری سرحدیں غیر محفوظ ہو رہی ہیں، ملک کی معیشت سکھڑتی جارہی ہے ،تمام مکاتب فکر کے درمیان ڈیبیٹ کا آغاز کیا جائے، تمام صوبوں اور طبقات کے نمائندوں کو بٹھا کر ان کے تحفظات سنے جائیں، یہ حکومت عوامی مینڈیٹ سے محروم ہے، شہباز شریف کو اخلاقی طور پر مستعفی ہونا چاہیے۔ انہوں نے مزید کہا کہ نئے انتخابات کرائے جائیں تاکہ ملک کے حقیقی نمائندے اقتدار سنبھال سکیں۔قومی اسمبلی میں امن و امان کی صورتحال پر ایک ہفتے تک تفصیلی بحث کرائی جائے۔

یہ بھی پڑھیں:چیمپئنز ٹرافی کے بعد آئی سی سی نئی پلیئرز رینکنگ جاری،بابر اعظم دوسری پوزیشن پر موجود