(ویب ڈیسک)موسیقی کے دلدادہ افرادکےلئے ویلو ساؤنڈ سٹیشن سیزن تھری کا آغاز ہوگیا۔
فلم "دی لیجنڈآف مولاجٹ"کے ذریعے سینما انڈسٹری میں نئی تاریخ رقم کرنے والے نامور ہدایتکار بلال لاشاری اور پروڈیوسر عمارہ حکمت میوزک لوورز کیلئے شاندار میوزک ویڈیوز کی تخلیق کرنے کے لیے میدان میں آگئے ہیں۔
ویلو ساؤنڈ سٹیشن سیزن تھری کی افتتاحی تقریب کا انعقاد شاہی قلعہ میں کیا گیا جس میں بین الاقوامی شہرت یافتہ گلوکار عاطف اسلم،سپر سٹار فواد خان.،گلوکارہ شئے گل،انورل خالد،فارس شفیع ،زین زوہیب ،میشا شفیع ،ینگ سٹنر، اداکارہ عفت عمر، فیشن ڈیزائنرمحسن نوید رانجھا،رانا منان، وقار بٹ ،ولید اورچئیرمین والڈ سٹی اتھارٹی کامران لاشاری سمیت دیگر نے شرکت کی،نامور فیشن ڈیزائنر ایچ ایس وائے نے تقریب کی میزبانی کی۔
سیزن تھری کا آغاز گلوکار فارس شفیع اور ذین زوہیب کے شاندار ویڈیو سونگ سے ہوا جسے حاضرین کی جانب سے بے حد پزیرائی حاصل ہوئی، ان کی لائیو پرفامنس نے تقریب کو چار چاند لگا دیئے۔
اس موقع پر شرکاء نے بلال لاشاری کی ڈائریکشن کو خوب سراہا ، سیزن تھری میں ہفتہ وار ویڈیوز کو ریلیز کیا جائے گا جس میں گلوکار عاطف اسلم، فواد خان ،شئے گل ،انورل خالد،ینگ سٹنر، حسن رحیم ،نتاشا نورانی، ریشم فیض ،عبد الحنان اور عدنان دھول اپنی بہترین پرفامنس کا مظاہرہ کرتے ہوئے جلوہ گر ہونگے ۔
واضح رہے کہ ویلو ساؤنڈ سٹیشن جو پاکستانی موسیقی کا ایک معروف پلیٹ فارم ہے اس کے گزشتہ سیزنز میں متعدد نئے فنکاروں اور تخلیقی موسیقی کو متعارف کرایاگیاتھا۔
یہ بھی پڑھیں:جو عزت نہ دے اسے زندگی سے نکال دیتی ہوں: رمشا خان
حالیہ سیزن میں”دی لیجنڈ آف مولا جٹ“ اور ”وار“ جیسی کامیاب فلموں کی ڈائریکشن دینے والے بلال لاشاری نے میوزک کی دنیا میں اپنے منفرد اندازسے اپنی دھاک بٹھادی ہے، اس سیزن میں بھی نامور گلوکاروں کے ساتھ ساتھ نئے گلوکاروں اور موسیقی کی نئی جہتیں سامنے لانے کی توقع کی جا رہی ہے۔