خیبر پختونخوا کی غیور عوام فتنہ الخوراج کے خلاف مزاحمتی دیوار

 (احمد منصور)پاک فوج دہشتگردی کیخلاف جاری جنگ میں بے شمار قربانیاں دے رہی ہے، دہشتگردی کے خلاف خیبرپختونخوا کی عوام بھی میدان عمل میں آگئی۔

خیبرپختونخوا کے باشعور عوام نے فتنہ الخوراج کے خلاف شدید مزاحمت کا آغاز کر دیا ہے، گزشتہ دو روز کے دوران خیبرپختونخوا کے مختلف علاقوں میں مقامی آبادی نے فتنہ الخوراج کے حملوں کو ناکام بنایا۔

سیکیورٹی فورسز کے شانہ بشانہ عوام نے فتنہ الخوراج کے دہشتگردوں کو نہ صرف بھاگنے پر مجبور کیا بلکہ جہنم واصل بھی کیا، ان واقعات نے خطے میں امن کے قیام کے لیے عوامی سطح پر اُبھرنے والے نئے جذبے کو نمایاں کیا ہے۔

ذرائع کے مطابق 12 اپریل کی رات فتنہ الخوراج کے دہشتگردوں نے ڈیرہ اسماعیل خان اور ڈیرہ غازی خان کے سرحدی گاؤں میں گھسنے کی کوشش کی۔ 12 دیہاتیوں نے فوری ردعمل دیتے ہوئے زبردست مزاحمت کی اور دہشت گردوں کو گاؤں سے بھاگنے پر مجبور کر دیا۔ اس واقعے کے بعد 13 اپریل کو دو قریبی دیہات کے عمائدین نے بڑے اجتماع کا انعقاد کیا۔

سکیورٹی ذرائع کے مطابق اس اجتماع میں دو ٹوک فیصلہ کیا گیا کہ کسی دہشتگرد کو بھی گاؤں میں گھسنے کی اجازت نہیں دی جائے گی، عوامی سطح پر یہ اتحاد دہشت گردوں کے خلاف واضح پیغام ہے۔

لکی مروت کے علاقے بچکان احمد زئی میں بھی سکیورٹی فورسز، پولیس اور ویلیج ڈیفنس کمیٹی نے فتنہ الخوراج کے 3 دہشتگرد جہنم واصل کئے، فتنہ الخوراج کے ان دہشتگردوں نے زبردستی علاقے میں گھسنے کی کوشش کی جسے ناکام بنایا گیا۔

آج 13 اپریل کو جنوبی وزیرستان کے علاقے توئی کھلہ میں فتنہ الخوراج کے دہشتگردوں نے پولیس اہلکاروں کے گھروں پر حملہ کیا، اس حملے کا مقصد پولیس اہلکاروں کو اغوا کرنا تھا۔

سکیورٹی ذرائع کے مطابق مقامی لوگوں اور پولیس نے بھرپور مزاحمت کی، جس کے نتیجے میں3 دہشت گرد جہنم واصل کیے، واقعہ کے بعد سکیورٹی فورسز نے موقع پر پہنچ کر مارے گئے خوراجیوں کی لاشیں قبضے میں لیں۔یہ واقعات ثبوت ہیں کہ عوام اور سکیورٹی فورسز متحد ہو کر دہشتگردی کے خلاف مضبوط دفاع تشکیل دے رہی ہیں۔

دفاعی ماہرین کے مطابق عوام اور سکیورٹی فورسزکا یہ اتحاد بلاشبہ ملک میں قیام امن کے لیے ایک مثبت پیش رفت ہے، دہشتگردی کے خلاف جنگ میں سیکیورٹی اداروں کے ساتھ عوام کا کھڑا ہونا فتنہ الخوراج کے لیے بڑی خبر ہے۔