چیئرمین پی سی بی کی جانب سے ویمنز کرکٹ ٹیمز کی کھلاڑیوں اور آفیشلز کے اعزاز میں شاندار تقریب 

(24نیوز)پاکستان کرکٹ بورڈ(پی سی بی)کے چیئرمین محسن نقوی کی جانب سے آئی سی سی  ویمنز کوالیفائر  کی6  کرکٹ ٹیمز کی کھلاڑیوں اور آفیشلز کے اعزاز میں شاہی قلعہ میں تقریب کا انعقاد کیا گیا۔

خواتین کھلاڑی شاہی قلعہ کی شاہی مہمان بن گئیں۔ شاہی استقبال،شاہی تواضع،دربانوں اور کینزاؤں کے فرشی آداب   کو ملحوط خاطر رکھا گیا۔

شاہی قلعہ کی تقریب میں میزبان پاکستان،بنگلہ دیش،ویسٹ انڈیز،آئرلینڈ،سکاٹ لینڈ اور تھائی لینڈ کی خواتین کھلاڑیوں،کوچنگ و مینجمنٹ سٹاف نے  شرکت کی،چئیرمین پی سی بی محسن نقوی نے شاہی قلعہ کے عالمگیری دروازے پر تمام ٹیموں کی کھلاڑیوں اور آفیشلز کو خوش آمدید کہا۔

چئیرمین پی سی بی محسن نقوی سے  کھلاڑیوں اور آفیشلز کا تعارف کرایا گیا،چئیرمین پی سی بی محسن نقوی نے تمام ٹیموں کیلئے نیک تمناؤں کا اظہارکیا،عالمگیری گیٹ پر تمام ٹیموں کی کھلاڑیوں اور آفیشلز کا چیئرمین پی سی بی محسن نقوی کے ساتھ گروپ فوٹو بنایا گیا۔ 

محسن نقوی نے کہاکہ پاکستان آنے والی تمام ٹیموں کا زندہ دلان لاہور میں خیرمقدم کرتے ہیں اور آپ سب ہمارے خصوصی مہمان ہیں،پاکستان پر امن ،محفوظ اور کرکٹ کے کھیل سے محبت کرنے والا  ملک ہے،امید ہے کہ زندہ دلوں کے شہر میں آپ کا قیام خوشگوار اور یادگار رہے گا۔ 

میچ ریفریز، ایمپائرز اور دیگر آفیشلز بھی تقریب میں شریک ہوئے،غیر ملکی خواتین کھلاڑیوں و میچ آفیشلز  کو شاہی قلعہ، بادشاہی مسجد، مزار اقبال اور حضوری باغ  کی سیر کرائی گئی ، غیر ملکی خواتین  کھلاڑیوں نے رنگیلا رکشہ کی سواری کو بہت انجوائے کیا۔

 ڈھولیچی گروپ کی شاندار پرفارمنس نے  سماں باندھ دیا،غیر ملکی پلئیرز بھی دھمال ڈالتی رہیں،دیوان خاص میں مغلیہ دور کے لباس میں ملبوس کینزاؤں نے غیر ملکی مہمانوں کا استقبال کیا اورفرشی آداب بجا لائیں۔ 

بادشاہ سلامت کی آمد کے بعد کتھک رقص کا بہترین مظاہرہ  کیا گیا جس پر غیر ملکی مہمان بہت محظوظ ہوئےاور بھرپور داد دی،بانسری کی  مدھر دھنوں نے   ویمنز پلیئرز  پر سحر کر دیا۔خواتین کھلاڑیوں اور آفیشلز کو دیوان عام،بارود خانہ،شیش محل کی بھی سیر کرائی گئی اورشاہی قلعہ کی تاریخ کے بارے آگاہ کیا گیا۔

غیر ملکی کھلاڑیوں اور میچ آفیشلز نے شاہی قلعہ کی تاریخی حیثیت میں گہری دلچسپی کا اظہارکیا،غیر ملکی مہمانوں کے اعزاز میں عشائیہ کا بھی اہتمام کیا گیا۔

غیرملکی ویمنز کھلاڑی کاکہناتھا کہ پی سی بی کا بہت شکریہ، تقریب یادگار تھی،تاریخی مقامات دیکھ کر خوشی ہوئی۔ لاہور سے خوشگوار یادیں لے کر جائیں گے۔

غیرملکی میچ آفیشلز نے کہاکہ بہت انجوائے کیا، پہلی بار ایسی ناقابل فراموش تقریب دیکھی۔ 

  امریکی قونصل جنرل کرسٹن کے ہاکنز، چیف آپریٹنگ آفیسر پی سی بی سمیر احمد، چیف فنانشل آفیسر جاوید مرتضیٰ، ہیڈ آف ویمنز کرکٹ رافعہ حیدر، ڈائریکٹر انٹرنیشنل کرکٹ عثمان واہلہ، ڈائریکٹر ڈومیسٹک کرکٹ عبداللہ خرم نیازی، ڈائریکٹر ایچ آر فیصل ملک اور اعلیٰ حکام بھی اس موقع پر موجود تھے۔