(24 نیوز ویب ڈیسک ٌپاکستانی معروف اداکارہ سدرہ بتول کی زندگی میں اچانک ایک بڑی تبدیلی آئی جس کی وجہ سے وہ مداحوں کو ڈراموں میں نظر نہیں آ رہی ہے۔
ان دنوں سوشل میڈیا کا رجحان کافی بڑھ گیا ہے اب شوبز کی شخصیات بھی اپنے مداحوں کے رابطے میں رہنے کے لیے اس کا استعمال کرتے ہیں ۔گزشتہ روز اداکارہ سدرہ بتول نے اپنی انسٹاگرام اسٹوری پر سوال جواب کا ایک سیشن رکھا۔
اس دوران ایک انسٹاگرام صارف کا سدرہ بتول سے پوچھنا تھا کہ آپ نے ڈراموں میں کام کرنا بالکل چھوڑ دیا ہے۔
جس کا جواب دیتے ہوئے سابقہ اداکارہ کا کہنا تھا کہ نہیں، اب سے بس میں اللّٰہ کے لیے کام کروں گی، اگر کوئی ایسا ڈرامہ بنتا ہے جو کہ اسلام سے متعلق ہو تو میں ضرور کروں گی۔ایک صارف کا پوچھنا تھا کہ اچانک آپ کی زندگی میں اتنا بڑا بدلاؤ کیسے آیا؟ ابھی حال ہی میں تو آپ فوٹو شوٹ کر رہی تھیں۔
اس سوال کے جواب میں سدرہ بتول کا کہنا تھا کہ آپ کی زندگی میں تبدیلی کسی بھی لمحے آ سکتی ہے، آئندہ میں صرف حجاب میں کام کروں گی، کون کہتا ہے کہ حجاب میں کام نہیں کیا جا سکتا۔
اس دوران سدرہ بتول نے اور بھی مداحوں کے کئی سوالوں کے جواب دیے۔
واضح رہے کہ سدرہ بتول عرصہ دراز سے ٹی وی اسکرین سے دور ہیں اور انہوں نے اپنے سوشل میڈیا سے بغیر حجاب کی تصویریں بھی ڈیلیٹ کر دی ہیں۔