لاہور میں ’حلال‘ بیئر فروخت ہونے لگی

(ویب ڈیسک )لاہورکے ایک ریسٹورنٹ نے حال ہی میں ایسے افراد کے لیے بیئر(ہلکی شراب) متعارف کروائی ہےجو کبھی کبھاراسے پینا چاہتے ہیں لیکن یہ بھی چاہتے ہیں کہ بیئرہو تو ’حلال‘ ہو۔ایسے افراد کے لیے بیئر کا ’حلال ورژن‘ تیارکرنے والے شیف کا کہنا ہے کہ یہ اُن کیلئے بہترین ہے۔

تفصیلات کے مطابق اس ریسٹورنٹ کے بارے میں سوشل میڈیا پلیٹ فارم فیس بک کی ایک ویڈیومیں سامنے آیا جہاں ایک خاتون رپورٹرکیفے میں جا کر بتاتی ہیں کہ یہاں نوجوان بناء کسی ہچکچاہٹ کے یہ بیئرپی سکتے ہیں کیونکہ یہ حلال ہے۔خاتون رپورٹر کے سوالات پرشیف عثمان نے بتایا کہ، ’کیفے سپاٹ لائٹ میں ’حلال‘ بیئر کے خصوصی شاٹس پیش کیے جاتے ہیں۔ اس کا مرکزی خیال دبئی سے اخذ کیا گیا تھا جہاں ہر قسم کی بیئردستیاب ہے، اس لیے میں نوجوانوں کے لیے کچھ ایسا متعارف کروانا چاہتا تھا جو ’حلال‘ ہوتا کہ نوجوان نسل بھی بیئرضرور پیے لیکن ’حلال طریقے‘ سے۔‘

اس ’حلال‘شراب کے اجزاء میں لائم سوڈا، فریش فروٹ پیوری، جوکا پانی اورسیون اپ سوڈا شامل ہیں۔عثمان کا کہنا ہے کہ بنیادی طورپرہم نوجوان نسل کو حرام سے ’حلال‘ کی طرف لارہے ہیں اور یہ بیئر فوڈ اتھارٹی سے منظور شدہ ہے۔

انہوں نے بتایا کہ ہم اپنے صارفین کے سامنے تمام اجزاء کویکجا کررکے بیئربناتے ہیں۔سوشل میڈیا صارفین کی بڑی تعداد نے اس عجیب وغریب خیال کو ناپسند کرتے ہوئے اپنے تبصروں میں تنقید کا نشانہ بنایا۔