(ویب ڈیسک) کیا آپ کسی کمپنی کے لیے گھر سے کام کر رہے ہیں، اور کسی دوسرے ملک میں منتقل ہونا چاہتے ہیں؟
اگر ہاں تو جاپان آپ کے استقبال کے لیے تیار ہے۔ ہاں، اگر جاپان میں رہنا اور کام کرنا آپ کا خواب ہے، تو یہ جلد ہی ممکن ہو جائے گا،جاپان 6 ماہ کا ڈیجیٹل نومیڈ ویزا پروگرام متعارف کرانے کا منصوبہ بنا رہا ہے۔
خیال رہے کہ ڈیجیٹل نومیڈ کی اصطلاح ان لوگوں کے لیے استعمال ہوتی ہے جو دفتر سے دور رہتے ہوئے گھر سے یا کہیں اور کام کرتے ہیں۔
جاپان کی امیگریشن سروسز ایجنسی نے اعلان کیا ہے کہ ڈیجیٹل نومیڈ ویزا پروگرام مارچ 2024 کے آخر میں شروع کیا جائے گا،اس پروگرام کے تحت، جاپانی رہائشی ویزا حاصل کرنے کے خواہشمند افراد کی سالانہ آمدنی کم از کم $67,557 ہونی چاہیے۔
یہ ویزا 49 ممالک اور خطوں کے لوگوں کے لیے ہوگا۔ لیکن ان ممالک یا خطوں کی تفصیلات ابھی سامنے نہیں آسکیں۔
خواہش مندوں کے لیے آمدنی کے ساتھ ساتھ پرائیویٹ ہیلتھ انشورنس بھی ضروری ہو گا،اس پروگرام کے تحت جاپان کا ویزا حاصل کرنے والے اپنے شریک حیات اور بچوں کو بھی وہاں لا سکیں گے۔
یہ بھی پڑھیں:2024 کی تعطیلات کا اعلان کردیا
جاپانی میڈیا کے مطابق ڈیجیٹل نومیڈ ویزوں کے حامل افراد کو مستقل رہائشی کارڈ جاری نہیں کیا جائے گا جبکہ ان کے قیام کی مدت میں فوری طور پر توسیع نہیں کی جائے گی,ان افراد کو 6 ماہ بعد اپنے ملک واپس جانا ہوگا جس کے بعد انہیں دوبارہ ویزا کی پیشکش کی جائے گی۔
واضح رہے کہ جاپان نے اعلان کیا ہے کہ وہ 2023 میں ڈیجیٹل نومیڈ ویزا پروگرام متعارف کرانے پر غور کر رہا ہے جس کی تفصیلات اب جاری کر دی گئی ہیں۔