(ویب ڈیسک)رکن قومی اسمبلی شیر افضل مروت کا کہنا ہے کہ مجھے پارٹی سے نکالنے کا فیصلہ بانی پی ٹی آئی عمران خان کا اپنا فیصلہ نہیں،مفاد پرست ٹولے کی وجہ سے سب کچھ ہو رہا ہے۔
شیر افضل مروت نے نجی ٹی وی سے گفتگو کرتے ہوئے کہا کہ مجھے مفاد پرست ٹولے نے پارٹی سے نکلوایا ہے، اس ٹولے نے گزشتہ ایک سال سے بانی پی ٹی آئی عمران خان کو محصور کیا ہوا ہے،اپنے معاملے پر بانی پی ٹی آئی سے ملاقات کی خواہش اب نہیں، بار بار پارٹی سے نکال کر میری بےتوقیری کی جا رہی ہے، مزید بےتوقیری برداشت نہیں کرسکتا۔
رکن قومی اسمبلی شیر افضل مروت نے مزید کہا کہ مجھے پارٹی سے نکالنا مکمل ناانصافی پر مبنی ہے، میرا مؤقف سنے بغیر مجھے پارٹی سے نکالنا افسوسناک ہے،مشکل وقت میں پارٹی کے ساتھ رہا۔
واضح رہے کہ گزشتہ روز بانی پی ٹی آئی عمران خان نے شیر افضل مروت کو پارٹی سے نکال دیا تھا۔
ذرائع کے مطابق شیر افضل مروت کو بار بار پارٹی ڈسپلن کی خلاف ورزی پر پارٹی سے نکالا گیا ہے۔
ذرائع نے بتایا تھا کہ شیر افضل مروت کو پارٹی کے خلاف بیانات دینے پر پہلے شوکاز نوٹس دیا گیا تھا،صوابی جلسے میں غیر ضروری تقریر پر بانیٔ پی ٹی آئی نے شیر افضل پر اظہار برہمی کیا، پارٹی رہنما جلد شیر افضل مروت کی بنیادی رکنیت ختم کرنے کا نوٹیفکیشن جاری کریں گے۔