پنجاب کے میدانی علاقوں میں شدید دھند، موٹروے جزوی بند،فلائٹس شیڈول متاثر 

(24نیوز) پنجاب اور سندھ کے میدانی علاقوں میں سردی بڑھنے سے دھند میں بھی  اضافہ ہوگیا۔ حد نگاہ انتہائی کم ہونے سے موٹروے کئی مقامات سے ٹریفک کیلئے بند کر دی گئی، فلائٹس کا شیڈول بھی  بری طرح متاثر ہوا۔

لاہور،ملتان، خانیوال، ساہیوال، سانگلہ ہل  سمیت پنجاب کے میدانی علاقوں میں دھند چھاگئی ۔حد نگاہ انتہائی کم رہنے سے شہریوں کو پریشانی کا سامنا کرنا پڑا۔ اوکاڑہ، چیچہ وطنی اور دیگر کئی علاقوں میں شدید دھند سے نظام زندگی مفلوج ہوکر رہ گیا۔

راولپنڈی اسلام آباد سمیت گردونواح میں بھی دھند  کا راج رہا۔اسلام آباد ایکسپریس وے مری روڈ ،نائتھ ایونیو، اندرون شہر ،ٹیکسلا روات واہ جی ٹی روڈ پر راستے دھندلا گئے۔موٹروے کے کئی سیکشن کو ٹریفک کیلئے بند کردیا گیا ہے۔موٹر وے پولیس نے دھند میں شہریوں کو بغیر ضرورت سفر سے گریز کی ہدایت کی ہے۔

ادھر دھند کے باعث فلائٹس کا شیڈول بھی متاثر ہو گیا، لاہور ایئرپورٹ پر فلائٹ آپریشن معطل کر دیا گیا۔ اسلام آباد انٹرنیشنل ائیرپورٹ پر پروازوں کا شیڈول بھی متاثر ہوا ۔پروازوں میں تاخیر سے مسافروں کو پریشانی کا سامنا کرنا پڑا۔محکمہ موسمیات کے مطابق آج بھی ملک کے بیشتر علاقوں میں موسم خشک اور سرد  رہے گا۔جبکہ شمالی بلوچستان، بالائی خیبرپختونخوا، کشمیر اور گلگت بلتستان کے کئی علاقوں میں برفباری کا امکان بھی ظاہر کیا جارہا ہے۔