امریکہ، کتے نے مالک کو گولی مار دی

(24 نیوز)کتا کسی انسان کو کاٹ لے تو یہ خاص بات نہیں مگر امریکا میں تو ایک کتے نے ایک شخص کو گولی مار دی۔

جیراڈ کرک ووڈ نامی شخص نے ممفس پولیس کو رپورٹ کیا کہ وہ بستر پر ایک گن کے ساتھ لیٹا ہوا تھا جب کتا چھلانگ لگا کر آیا اور حادثاتی طور پر گن سے فائر کرکے جیراڈ کو زخمی کر دیا۔

جیراڈ کرک ووڈ کے ایک سالہ کتے اوریو کا پنجہ گن میں پھنس گیا تھا، اسے نکالنے کی کوشش میں اوریو نے ٹریگر دبا کر اپنے مالک کو گولی مار دی۔

اس وقت گھر میں جیراڈ کرک ووڈ کی ایک دوست خاتون بھی موجود تھی جو گن چلنے کے بعد گھر سے چلی گئی اور گن کو بھی اپنے ساتھ لے گئی۔

زخمی شخص کو ہسپتال لے جایا گیا اور ڈاکٹروں کے مطابق اس کی حالت زیادہ خراب نہیں۔

مزید پڑھیں:ایران کا ساحل خونی رنگ میں تبدیل، سیاح خوفزدہ

مقامی پولیس نے بعد ازاں اس خاتون سے بھی بات کی جس کا کہنا تھا کہ اوریو ایک اچھا کتا ہے جو اپنے مالک کے اردگرد اچھلنا اور کھیلنا پسند کرتا ہے۔

اس واقعے سے یہ بھی عندیہ ملتا ہے کہ امریکا میں اسلحے کا استعمال کتنا عام ہے اور اس وجہ سے اکثر حادثاتی فائرنگ کے واقعات بھی سامنے آتے ہیں۔

جیراڈ کرک ووڈ پہلا شخص نہیں جسے کسی پالتو جانور نے گولی ماری ہو۔

2018 میں رچرڈ ریمی نامی شخص نے رپورٹ کیا تھا کہ اس کے کتے نے حادثاتی طور پر گن کو چلا کر اسے زخمی کر دیا تھا۔

اسی طرح 2019 میں میٹ برینچ نامی شخص کو بھی اسی طرح کے تجربے کا سامنا کرنا پڑا تھا۔