قبلہ اول پر چڑھائی کی گئی، اسرائیلی بربریت بند ہونی چاہیے،شاہ محمود قریشی

 (24نیوز) وزیرخارجہ شاہ محمود قریشی نے کہا ہے کہ اللہ پاکستان کو بھارت جیسے حالات سے محفوظ رکھے، احتیاطی تدابیر سے کورونا پر قابو پایا جا سکتا ہے۔ قبلہ اول پر چڑھائی کی گئی، اسرائیلی بربریت کا کھیل بند ہونا چاہیے۔

 تفصیلات کے مطابق ملتان میں نماز عید کے اجتماع سے خطاب کرتے ہوئے وزیرخارجہ کا کہنا تھا کہ پوری قوم کورونا کے چیلنج سے نبرد آزما ہے،عید کے دوران قوم نے ذمہ داری کا مظاہرہ کرنا ہے، احتیاطی تدابیر کے ذریعے کورونا پر قابو پایا جا سکتا ہے، بھارت میں لاکھوں افراد روزانہ کورونا سے متاثر ہو رہے ہیں، اللہ تعالی پاکستان کو بھارت جیسے حالات سے محفوظ رکھے۔

واضح رہے انہوں نے کہا کہ وزیراعظم کی ترک صدر سے فلسطین کےمعاملے پر بات چیت ہوئی، مجھے وزیراعظم کا ترک وزیرخارجہ کے ساتھ رابطے کا پیغام ملا، فلسطین کی صورتحال پر آج ترک ہم منصب سے بات کروں گا، وزیراعظم نے سعودی قیادت کے ساتھ بھی بات کی، پاکستان کا فلسطین کے حوالے سے واضح مؤقف ہے، 27 رمضان کوقبلہ اول پر بےدردی سے چڑھائی کی گئی۔

وزیرخارجہ نے مزید کہا کہ مسئلہ کشمیر اور فلسطین دونوں حل طلب ہیں، سلامتی کونسل میں بھی مسئلہ فلسطین کواجاگر کیا گیا، افغانستان میں امن عمل آگے بڑھ رہا ہے، عالمی برادری نے افغان امن میں پاکستان کے کردار کی تعریف کی، پاک ایران تعلقات میں بہتری اورگرم جوشی ہے۔

یہ بھی پڑھیں:    قبلہ اول میں فلسطینی مسلمانوں پر اسرائیلی مظالم، مولانا طارق جمیل بھی بول پڑے