فلمساز و ہدایتکار ایس سلیمان 80 برس کی عمر میں انتقال کرگئے

(24 نیوز)پاکستان فلم انڈسٹری کے نامور ہدایتکاراور فلمساز ایس سلیمان 80 برس کی عمر میں انتقال کرگئے، ان کی تدفین ان کے صاحبزادے کی بیرون ملک سے آمد کے بعد  جمعہ کے روز کی جائے گی ۔ایس سلیمان کی اہلیہ معروف اداکارہ زری پناکے مطابق ایس سلیمان طویل عرصے سے گردوں کے عارضے میں مبتلا تھے ،وہ فالج کا شکار تھے اور انہیں شوگر کا بھی مرض تھا۔ 

تفصیلات کے مطابق دوروز قبل ایس سلیمان کی حالت زیادہ بگڑ گئی تھی جس پر انہیں ہسپتال داخل کرایا گیا مگر وہ جانبر نہ ہو سکے۔ایس سلیمان کی پہلی فلم ’’گلفام‘‘ 1961 میں ریلیز ہوئی، انہوں نے 60 سے زائدفلموں کی ہدایتکاری کی، انکی فلموں میں بہاروں کی منزل ،اناڑی، زینت، باجی، اف یہ بیویاں، محبت، تصویر اور الزام ،آگ، جیسے جانتے نہیں، لوری، تیری صورت، میری آنکھیں اور انسانیت سمیت کئی فلمیں شامل ہیں۔ ایس سلیمان نے سوگواران میں بیوہ ایک بیٹی اور دو بیٹے چھوڑے ہیں۔انکا بڑا بیٹا بیرون ملک مقیم ہے ان کی واپسی پرجمعہ کو لاہور کی نجی سوسائٹی میں ایس سلیمان کی نماز جنازہ ادا کی جائے گی۔شوبز  انڈسٹری سے تعلق رکھنے والی شخصیات نے ایس سلمان کے انتقال پر انکے اہل خانہ سے تعزیت کرتے ہوئے انکی مغفرت کی دعا کی ہے ۔  فلم ڈائریکٹر ایس سلیمان ماضی کے معروف اداکارسنتوش کمار اور درپن کے چھوٹے بھائی اور اداکار منصور کے بڑے بھائی تھے.

یہ بھی پڑھیں: وزیراعظم 16 اپریل کو سکھر اورکراچی کا دورہ کریں گے