پاکستان کی کہانی

پاں،پاں،پاں۔۔۔دماغ پر تشدد کرنیوالی آواز سے میری آنکھ کھلی تو پتا چلا کہ آج یوم آزادی ہے،محلے کے بچے جشن منارہے ہیں،آنکھیں ملتے ہوئے اپنے آپ کو فعال بنانے کی کوشش کی تو نظر موبائل فون کی سکرین پر پڑی توطرح طرح کے فلسفوں سے بھرے سوشل میڈیا پیغامات موصول ہوچکے تھے،کسی نے آزادی کی مبارک دی تو کوئی آزادی کا جشن  منانے کے حق میں نہیں تھا ۔باجوں کی پاں پاں کے شور میں دفتر پہنچا تو یہاں بھی پوری عمارت کو رنگ برنگی روشنیوں اور سبز سفید غباروں سے سجایا گیا تھا ،اپنی سیٹ پرپہنچا تو سوچوں میں گم ہوگیا کہ یہی آزادی ہے؟اچانک میرے ذہن میں پاکستان کی داستان گھومی ،ایسی داستان جو کسی بھی پاکستانی کو جھنجوڑنے کیلئے کافی ہے۔یہ کہانی اسی وطن کی زبانی سنیں جس کی پیدائش 14 اگست 1947 کو ہوئی ۔

میں پاکستان ہوں، میرے پیدا ہونے سے آج تک کی ایک بہت لمبی کہانی ہے۔ ایک کٹھن سفر ہے۔ میرے پیدا ہونے سے پہلے ہی میرا نام پاکستان رکھا گیا۔ 1947ء میں جب میرا جنم ہوا تو مفلوک الحال غریب کے بچے کی طرح میرے تن پہ کپڑے، پیٹ میں نوالے نہیں تھے۔ میرا بچپن اور لڑکپن ایسے ہی گزر گئے بلکہ اس حال میں مجھے کئی لڑائیاں بھی لڑنی پڑیں، جس کے مجھ کو زخم بھی آئے جن سے آج بھی خون رس رہا ہے۔

میری پیدائش پر جہاں خوشیاں منائیں گئیں تو وہیں لاکھوں قربانیاں بھی دی گئیں، کئی سہاگ اجڑے تو لاکھوں یتیم ہوئے۔ کئی بے گھر ہوئے، دربدر ہوئے۔ مجھے بچپن سے لیکر آج تک آئین کی زنجیروں میں جکڑنے کی کئی بار کوشش کی گئی، پہلے انگریزوں کا قانون لاگو کیا گیا۔ پھر 1949ء میں قرارداد مقاصد کے نام پر مجھے ’مولوی‘ بنانے کی کوشش کی گئی، یہ بات جب سیکولر طبقے کو ہضم نہ ہوئی تو مجھے لادین ثابت کرنے کی کوشش میں لگ گئے۔ 1952ء اور 1956ء میں ایک بار پھر زنجیریں پہنائیں گئیں جو دو سال بعد ہی ٹوٹ گئیں۔

1962ء، 1973ء میں بھی آئین آئین کا کھیل کھیلا گیا، جن میں اب تک کئی تبدیلیاں کردی گئیں لیکن آج تک اپنی روح کے حساب سے کبھی نافذ نہ ہو سکا۔ مجھ پر طرز حکمرانی کے بھی طرح طرح کے تجربے کیے گئے۔ کبھی جمہوری نظام لایا گیا تو کبھی فوجی چھتری تلے پناہ ڈھونڈی گئی، کبھی اسلامی سوشلزم کا سہارا لیا گیا تو کبھی خود ساختہ شریعت کا، میرے بیٹوں نے مجھ پر بندوق کے ذریعے اپنا حکم چلانے کی کوشش کی۔

ضرور پڑھیں:عمران خان کو ’ارینج میرج‘مہنگی پڑی

میں 76 سال کا ہوگیا ہوں، لیکن آج بھی غریب ہوں۔ آج بھی کمزور ہوں، بھلا کیوں؟ کبھی سوچا میرے بیٹو! میرے ساتھ جنم لینے والے کہاں سے کہاں پہنچ گئے۔ میرے سے 2 سال بعد آپ کے ہمسائے میں جنم لینے والا چین جس کا دنیا مذاق اڑاتی تھی۔جس کے بنائے گئے باجے آپ میرے یوم پیدائش پر بجاتے نہیں تھکتے، جو مجھ سے کئی درجے کمزور تھا۔ کل تک مجھ سے بھیک مانگتا تھا۔ آج دنیا پر راج کرتا ہے۔ دنیا کے سب وسائل اس کے قدموں میں ہیں۔ کل دنیا جسے گونگا سمجھتی تھی آج وہ بولتا ہے دنیا سنتی ہے۔ میرا آج حال یہ ہے کہ پورا کا پورا بدن زخموں سے چور ہے۔ سندھ میں مہاجرازم اور قوم پرستی کا زہر اگلا جارہا ہے۔ بلوچستان میں آزادی کے نام پر گلے کاٹے جارہے ہیں۔ فاٹا میں مذہب کے نام پر بارود بچھایا گیا، مسجدوں، امام بارگاہوں میں جہاں محبت کے پھول ملتے تھے وہاں نفرت بیچی گئی۔ مذہب کو تجارت بنایا گیا۔سیاست میں اتنی نفرت کے اب لوگ میرے نام پر اپنے قائدین کو فوقیت دیتے ہیں ۔

1947ء سے قبل ایک گورے انگریز کا غلام تھا آج کئی کالے انگریزوں کے شکنجے میں جکڑا ہوا ہوں۔ معاشی طور پر سرمایہ دار گلا گھونٹ رہا ہے تو جاگیردار غریب کے بچوں کو اپاہج کر رہا ہے۔ ایسے گھناؤنے کام کیے جارہے ہیں کہ مجھے اپنا منہ چھپانا پڑ رہا ہے۔ یہاں آزادی ہے تو سود خوروں کو ہے۔ رشوت عام ہے، بھتہ خوروں، بدعنوانوں، جھوٹے، منافقوں، ذخیرہ اندوزوں، دہشتگردوں، کام چوروں، خوشامدی سیاستدانوں کو آزادی ہے۔ یہاں کی صحافت تجارت بن چکی، یہاں علم کی بولی لگتی ہے اور قلم بکتے ہیں۔ سیاست بدنام ہوچکی، غیرت بے نام ہوچکی، یہاں کی تجارت پیشہ پیغمبری نہیں رہی، تھانوں میں جائے تو انسان کپڑے بھی اتروا کر نکلتا ہے، یہاں کے پولیس والے سگریٹ کی ڈبیا کی خاطر اپنا ایمان فروخت کردیتے ہیں، استاد، استاد نہیں رہا اور شاگرد، شاگرد نہیں رہا۔ علم دینے والے صنعتکار بن گئے اور علم حاصل کرنے والے سردار بن گئے ہیں۔ یہاں غریبوں کے بچے راتوں کو بھوکے سوجاتے ہیں اور بڑے بڑے گھروں اور توندوں والے پوچھنا تک گوارہ نہیں کرتے۔ میرے بیٹے کیا اقبال نے میرے ایسے ہی مستقبل کا خواب دیکھا تھاٖ؟ آپ کے بابا قائد اعظم نے اسی دن کیلئے جدوجہد کی تھی؟

یہ بھی پڑھیں:عمران خان کے لیے بڑا ریلیف ، نواز شریف کو بڑی شکست 

جشن آزادی کی تقریبات ہوئیں تومیری عظمت میں گیت گائے گئے،کسی نے کہا’یہ وطن تمہارا ہے تم ہو پاسباں اس کے‘ کسی نے ’سوہنی دھرتی اللہ رکھے قدم قدم آباد تجھے‘ کا ملی نغمہ گایا،جلسوں اور ریلیوں میں محبت کے بڑے بڑے دعوے بھی کیے گئے۔کسی نے کہا کہ میں سب کو روٹی، کپڑا اور مکان دوں گا،کسی نے کہا مجھے(پاکستان) کوسپر پاور بنا دیا جائیگا۔ کوئی مجھے میل کچیل اتار کر نیا بنانے کی بات کررہا تھا، تو کوئی یہ کہتے پایا گیا کہ میں رب اور رب کے نظام کو بھول چکا ہوں اور وہ مجھے دوبارہ کلمہ پڑھانے کی کوشش کرے گا۔ کوئی کہتا ہے کہ میرے مہاجر بیٹوں کے ساتھ انصاف نہیں ہورہا، ہم ان کو انصاف دینگے، ٹی وی والے بھی ٹھنڈے کمروں میں بیٹھ کر طرح طرح کی بڑھکیں ماررہے تھے۔

میں بھی مایوس نہیں،میں اپنے بچوں کی طرح پر امید ہوں، میرے بیٹے میری حفاظت کیلئے سرحدوں پر موجود ہیں۔ وہ مجھے بچائیں گے،جو دن رات محنت کررہے ہیں  وہ مجھے ترقی دینگے۔یہ بن دیکھے دشمن سے لڑے،انہوں نے 9 مئی جیسی سازش کا مقابلہ کیا،میری طرف جو میلی آنکھ  اٹھی وہ باقی نہ رہی ،اب بھی میرے لئے بن دیکھے دشمن کو جہنم میں جھونک رہے ہیں۔ مجھے فخر ہے ان ماؤں پر جو اپنے بیٹوں کی جدائی تو سہتی ہیں لیکن میرے خلاف اٹھنے والی آواز کو کبھی برداشت نہیں کرتیں۔ دنیا مجھے میرے روشن مستقبل کی نوید سنا رہی ہے، میں ایک روشن دلیل ہوں۔ میں اللہ کا انعام ہوں۔ میں پاک ہوں کیونکہ ’’میں پاکستان ہوں‘‘۔اسی کہانی کی سوچوں میں گم تھا کہ کسی نے جھنجوڑ کر کہا آزادی مبارک۔

ضروری نوٹ:ادارے کا بلاگر کے ذاتی خیالات سے متفق ہونا ضروری نہیں۔ایڈیٹر