بھارت: ڈاکو دلہنیں گھر سے نقدی اور زیورات لوٹ کر فرار

(ویب ڈیسک) بھارت میں دو بھائیوں کی شادی کے بعد گھر میں دلہنوں کے آنے کی خوشی چند روز بھی برقرار نہ رہ سکی۔ دونوں لڑکیاں گھر سے نقدی و زیورات اور قیمتی سامان لے اڑیں۔

لٹیری دلہنوں نے گھر کے تمام افراد کو گھر میں بند کرکے باہر سے تالا لگا دیا اور گھر میں موجود سونے کے زیورات اور نقدی لوٹ کر فرار ہوگئیں۔

بھارتی میڈیا کے مطابق 11 جون کو ہونے والی شادی کا ڈراپ سین 15 جون کو ہوگیا، پولیس نے مدعی بھرت کی شکایت پر مقدمہ درج کر لیا اور ملزمان کی تلاش میں چھاپے مارنا شرع کردیے۔

پولیس کے تفتیشی افسر نے بتایا کہ 15 جون کو دونوں لڑکیاں گھر سے پیسے اور زیورات اٹھا کر باہر نکل گئیں، ملزمان خواتین نے گھر کو باہر سے تالا لگا دیا۔ گھر میں بند ماں نے جب بھرت کو فون کرکے ساری حقیقت بتائی تو اس کے پاؤں تلے سے زمین نکل گئی۔ بھرت نے اپنی بیوی کے موبائل پر کال کی۔ پہلے اس پر کوئی جواب نہ آیا، پھر موبائل بند ہوگیا۔

یہ بھی پڑھیے: شوہر کی سانولی رنگت، بیوی نے جینا دوبھر کردیا

مدعی بھرت گپتا نے پولیس کو بتایا کہ جب ہم دونوں بھائیوں کا رشتہ انجلی اور سنجنا سے طے ہوا تو رشتہ طے کرنے والوں نے کہا تھا کہ ان بے سہارا لڑکیوں کا کوئی نہیں ہے۔

اس کا کہنا تھا کہ رشتہ کروانے والے نے بتایا کہ دونوں بہنوں کی معاشی حالت بھی خراب ہے لہٰذا ایسے میں شادی کے تمام اخراجات بھی دولہا کے گھر والوں کو برداشت کرنا ہوں گے۔ بھرت نے بتایا کہ ہم نے شادی میں تقریباً 5 لاکھ روپے خرچ کیے تھے۔