پاکستان بنگلہ دیش سیریز، کیا کراچی ٹیسٹ تماشائیوں کے بغیر ہوگا؟

(24نیوز) پاکستان اور بنگلہ دیش کے درمیان ہونے والا ٹیسٹ سیریز سے پہلے ہی شائقین کرکٹ کیلئے بری خبر سامنے آگئی ہے، پی سی بی نے بنگلا دیش کے خلاف 2میچوں کی ٹیسٹ سیریز کا ایک میچ تماشائیوں کے بغیر کرانے کا فیصلہ کیا ہے۔

پاکستان کرکٹ بورڈ (پی سی بی)  کے مطابق پاکستان اور بنگلا دیش کے درمیان کراچی ٹیسٹ تماشائیوں کے بغیر کھیلا جائے گا، یہ فیصلہ سٹیڈیم میں جاری ترقیاتی کام کی وجہ سے کیا گیا ہے، بورڈ کے مطابق آئی سی سی چیمپئنز ٹرافی 2025 کی تیاریوں کے سلسلے میں نیشنل بینک سٹیڈیم کراچی میں جاری تعمیراتی کام کی وجہ سے پاکستان کرکٹ بورڈ نے بنگلا دیش کے خلاف دوسرے ٹیسٹ میچ کے انعقاد کے بارے میں مشکل فیصلہ کیا ہے کہ کہ 30 اگست سے 3 ستمبر تک ہونے والا یہ ٹیسٹ میچ تماشائیوں کے بغیر کھیلا جائے گا۔

پی سی بی کے اعلامیے میں کہا گیا ہے کہ ہم تماشائیوں کے پرجوش کردار کو سمجھتے ہیں تاہم ہمارے مداحوں کی صحت اور حفاظت ہماری اولین ترجیح ہے، تمام دستیاب آپشنز پر بغور غور کرنے کے بعد فیصلہ کیا گیا ہے کہ دوسرے ٹیسٹ کو خالی اسٹیڈیم میں منعقد کیا جائے، اس فیصلے کے نتیجے میں ٹکٹوں کی فروخت فوری طور پر معطل کر دی گئی ہے، وہ شائقین جنہوں نے پہلے ہی ٹکٹ خریدے ہیں انہیں خریداری کے وقت فراہم کردہ اکاؤنٹ کی تفصیلات میں جمع کی گئی رقم خود بخود مکمل واپس مل جائے گی۔

کرکٹ بورڈ کا کہنا ہے کہ اگرچہ ہمیں اس فیصلے کی وجہ سے ہونے والی تکلیف پر افسوس ہے لیکن ہم اپنے قابل قدر شائقین کو یقین دلانا چاہتے ہیں کہ سٹیڈیم میں جاری اپ گریڈ اور تزئین و آرائش کو مزید تماشائیوں کے لیے سازگار بنانا اور اسے آئی سی سی چیمپئنز ٹرافی 2025 کے لیے تیار کرنا ہمارے عزم کا حصہ ہے جو 1996 کے بعد پاکستان میں منعقد ہونے والا پہلا آئی سی سی ایونٹ ہوگا۔

یہ بھی پڑھیں: پاکستان کی والی بال پلیئر عذرا فاروق مالدیپ میں موسٹ ویلیو ایبل پلیئر قرار