(24 نیوز) ماضی کی معروف اداکارہ فردوس بیگم کو برین ہیمرج کے سبب لاہور کے نجی ہسپتال میں داخل کرا دیا گیا ہے۔ خاندان کی جانب سے سینئر اداکارہ کے برین ہیمرج سے متاثر ہونے کی تصدیق کی گئی ہے۔
فردوس بیگم کے خاندانی ذرائع نے میڈیا کو بتایا ہے کہ فردوس بیگم ہسپتال میں زیرِ علاج ہیں، اہلِ خانہ نےان کے چاہنے والوں سے انکی جلد صحتیابی کیلئے دعاؤں کی اپیل کی ہے۔
اداکارہ فردوس بیگم لاہور میں 1947ء میں پیدا ہوئیں۔ ان کے گھر والوں نے ان کا نام پروین رکھا تھا، لیکن انھیں فلم نگری میں فردوس کے نام سے شہرت اور مقام حاصل ہوا۔ ان کی عمر 71 سال ہے۔
پاکستان فلم انڈسٹری کی مقبول اداکارہ فردوس بیگم نےمشہور پنجابی فلم’’ ہیر رانجھا‘‘ میں ‘ہیر’ کا کردار نبھایا تھا اور شائقین کی توجہ حاصل کی تھی۔ فلم ہیر رانجھا نے دنیا بھر میں مقبولیت حاصل کی تھی ، میڈم فردوس بیگم نے متعدد اردو اور پنجابی فلموں میں اپنی اداکاری کے جوہر دکھائے۔