سیاستدانوں نے اپنے مفادات کیلئے جمہوریت پر سمجھوتہ کیا :مولانا فضل الرحمان

(24نیوز)جے یو آئی (ف) کے سربراہ مولانا فضل الرحمان نے کہا ہےکہ کسی سیاستدان کو قید کرنے کے حق میں نہیں اور بانی پی ٹی آئی کی رہائی کی کوششوں میں میراکوئی کردارنہیں ہے۔

لندن میں میڈیا سے گفتگو کرتے ہوئے مولانا فضل الرحمان نے خواجہ آصف کے ساتھ لندن میں پیش آئے واقعے کی مذمت کی،مولانا فضل الرحمان نے کہا کہ برطانیہ کی ذمہ داری ہے خواجہ آصف کے معاملے میں قانون کے مطابق کارروائی کرے ۔

ایک سوال کے جواب میں فضل الرحمان نے کہا کہ ہم امریکا کی سیاست میں مداخلت کرتے ہیں نہ انہیں اپنے ملک میں مداخلت کی اجازت دے سکتے ہیں، امر یکا میں ری پبلکن کی حکومت ہو یا ڈیموکریٹس کی، دنیا کیلئے ان کی پالیسی ایک ہے۔

مولانا فضل الرحمان کا کہنا تھا کہ ہمیشہ آئین اور جمہوریت پر شب خون مارا گیا، جمہوریت کی کمزوری میں سیاستدانوں کا بڑا کردار ہے، سیاستدانوں نے اپنے مفادات کیلئے جمہوریت پر سمجھوتہ کیا،کسی سیاستدان کو قید کرنے کے حق میں نہیں،بانی پی ٹی آئی کی رہائی کی کوششوں میں میراکوئی کردارنہیں ہے۔