سموگ کی چھٹی، محکمہ موسمیات نے بارش کی پیشگوئی کر دی

(روزینہ علی)ملک بھر میں سموگ نے شہریوں کا جینا دو بھر کر رکھا ہے ایسے میں محکمہ موسمیات نے کل ملک بھر میں بارش کی پیشگوئی کر دی ہے ۔

موسم کا حال بتانے والوں کا کہنا ہے کہ جمعہ کے روز اسلام آباد اور گردونواح میں مطلع ابر آلود رہنے کے علاوہ تیز ہواؤں اورگرج چمک کے ساتھ بارش کا امکان ہے ، خیبر پختونخوا  کے متعدد علاقوں میں بھی بارش کی پیشگوئی کی گئی ہے ان علاقوں میں چترال ، دیر، سوات، کوہستان،شانگلہ، بٹگرام، بونیر، مانسہرہ، ایبٹ آباد، ہری پور، مالاکنڈ،باجوڑ، مردان، مہمند، چارسدہ، صوابی ، نوشہرہ، پشاور، خیبر، کوہاٹ، کرم، اورکزئی، ہنگو ،بنوں ، وزیرستان، لکی مروت ، ٹانک اور ڈیرہ اسماعیل خان شامل ہیں جبکہ پہاڑوں پر برفباری کی بھی امید ظاہر کی گئی ہے ۔

پنجاب  والوں کو بھی موسم میں بہتری اور بارش کی خوشخبری سنائی گئی ہے ، محکمہ موسمیات کا کہنا ہے کہ لاہور ،  راولپنڈی، مری، گلیات، اٹک، چکوال، تلہ گنگ، جہلم، گجرات، فیصل آباد، گوجرانوالہ،سیالکوٹ،نارووال، میانوالی، خوشاب ،سرگودھا، بھکر، لیہ، ڈیرہ غازی خان گردنواح میں مطلع جزوی ابر آلود رہنے کے علاوہ شام/رات میں چند مقامات پر تیز ہواؤں اور گرج چمک کے ساتھ بارش کا امکان ہے ۔

  بلوچستان کے شمالی اضلاع میں مطلع جزوی ابر آلود رہنے کے علاوہ کوئٹہ، زیارت، پشین، قلعہ عبداللہ، قلعہ سیف اللہ، ژوب ، شیرانی ، موسی خیل لورالائی ،بارکھان ،سبی اور گردونواح میں چند مقا مات پر تیز ہواؤں اور گرج چمک کے ساتھ بارش کا امکان۔ جبکہ صوبہ کے دیگراضلاع میں موسم خشک رہنے کی توقع ہے  ۔

سندھ کے بیشتر اضلاع میں موسم خشک رہنے کا امکان ہے، کشمیر اور گلگت بلتستان میں مطلع ابرآلود رہنے کے علاوہ گرج چمک کے ساتھ بارش اور پہاڑوں پر برفباری کی توقع ہے ۔