پنجاب اور پختونخوا کے بعد عمران خان کا دورۂ سندھ ، چیئرمین پی ٹی آئی کراچی پہنچ گئے
Stay tuned with 24 News HD Android App
(24 نیوز) پنجاب اور پختونخوا کے بعد کپتان کے دورۂ سندھ کی تیاریاں، چیئرمین تحریک انصاف عمران خان کراچی پہنچ گئے۔
مرکزی سیکرٹری جنرل اسدعمر اور تحریک انصاف سندھ کے صدر علی حیدر زیدی سمیت مرکزی و صوبائی ذمہ داران چیئرمین عمران خان کا خیرمقدم کریں گے۔ عمران خان آج کراچی میں بھرپور دن گزاریں گے۔
دورۂ سندھ کے دوران عمران خان بلدیاتی انتخابات میں حصہ لینے والے امیدواروں سے ملاقات کریں گے۔ تحریک انصاف سندھ اور کراچی کے ذمہ داران بھی چیئرمین عمران خان سے الگ الگ خصوصی ملاقاتیں کریں گے۔
عمران خان کراچی میں وکلاء اور شعبۂ قانون سے وابستہ افراد کے بڑے کنونشن سے مخاطب ہوں گے۔ صحافیوں اور اہلِ قلم و دانش کے ساتھ خصوصی نشست بھی چیئرمین تحریک انصاف کے شیڈیول میں شامل ہے۔
دن کے اختتام پر چیئرمین پی ٹی آئی عمران خان کراچی میں عظیم الشان اجتماعِ عام سے تاریخی خطاب کریں گے۔ چیئرمین تحریک انصاف کے تاریخی دورۂ کراچی کی تمام تیاریاں مکمل کرلی گئیں۔