'' حکومت سے صرف صاف اور شفاف انتخابات پر ہی مذاکرات ہوسکتے ہیں ''

(ویب ڈیسک) عمران خان نے کہا کہ حکومت سے صرف صاف اور شفاف انتخابات پر ہی مذاکرات ہوسکتے ہیں، ملک سری لنکا کی طرف جا رہا ہے۔

یہ بھی پڑھیں:عمران خان جے آئی ٹی کے سامنے پیش، 20 منٹ تک تفتیش

سابق وزیراعظم و چیئرمین پی ٹی آئی عمران خان نے میڈیا سے گفتگو کرتے ہوئے کہا کہ 26 سال سے سیاست کر رہا ہوں، ہر کام ہمیشہ قانون اور آئین کے دائرہ میں رہ کر کیا ہے، مجھے معلوم ہے کہ میرے خلاف بنایا گیا مقدمہ ایک مذاق ہے، یہ کیس ساری دنیا کے سامنے مذاق بن گیا ہے۔

عمران خان نے کہا ہمیں آپ جتنا دیوار سے لگائیں گے ہم اتنا ہی مضبوط ہوں گے، سیلاب متاثرین کے لئے امداد اکٹھی کرنے پر چیلنز پر پابندی لگا دی گئی، ان ہتھکنڈوں کے باوجود 5 گھنٹوں میں 10 ارب روپے اکٹھے کئے، معاشی حالات اور سیلاب کی وجہ سے خاموش رہا لیکن انتظار کی گھڑیاں اب ختم ہونے والی ہیں، میں قوم کے سامنے پیغام دے رہا ہوں، جس دن میں نے کال دی آپ برداشت ہی نہیں کر سکیں گے۔

سابق وزیراعظم کا کہنا تھا کہ شہباز گل پر جنسی تشدد کیا گیا جس پر قانونی کارروائی کا کہا تھا، حکومت سے صرف صاف اور شفاف انتخابات پر ہی مذاکرات ہوسکتے ہیں، ملک سری لنکا کی طرف جا رہا ہے، حکومت عوام میں نہیں نکل سکتی، سیاسی فنڈنگ کرنے والوں کو ڈرایا دھمکایا جا رہا ہے۔

قبل ازیں سابق وزیرعظم و چیئرمین پی ٹی آئی عمران خان جے آئی ٹی کے سامنے پیش ہوگئے۔ عمران خان سے 20 منٹ تک تفتیش کی گئی۔

ذرائع کے مطابق پولیس ٹیم کی جانب سے تحریری طور پر 21 سوالات پر مشتمل سوالنامہ دیا گیا۔ پولیس کی جانب سے کچھ زبانی سوالات بھی کئے گئے۔ ایس ایس پی انویسٹی گیشن کی سربراہی میں ٹیم نے سوالات کئے۔