مہنگے بجلی کے بل عوام کیلئے ناقابل برداشت ہو چکے ہیں ، نواز شریف

(24 نیوز)پاکستان مسلم لیگ (ن) کی اعلی قیادت کے مشاورتی اجلاس کی اندرونی کہانی سامنے آگئی ہے ۔

تفصیلات کے مطابق پاکستان مسلم لیگ (ن) کے صدر محمد نوازشریف نے پارٹی اجلاس کی صدارت کی، پارٹی سیکریٹریٹ ماڈل ٹاﺅن میں منعقدہ اجلاس میں وزیراعظم محمد شہبازشریف بھی شریک ہوئے ،اجلاس میں عوام کو مہنگائی خاص طورپر بجلی کے مہنگے بلوں میں ریلیف دینے پر تفصیلی غور کیا گیا ،  نواز شریف نے کہا کہ مہنگے بجلی کے بل عوام کے لئے ناقابل برداشت ہیں، پی ٹی آئی کی لائی تباہی مہنگائی اور مہنگے بل لائی ہے لیکن ہم سے عوام ریلیف کی توقع کرتے ہیں، یہ ہماری صلاحیتوں کا امتحان ہے کہ مشکل ترین حالات میں بھی عوام کو ریلیف کیسے دینا ہے، ملک کو ڈیفالٹ سے بچانا، معاشی استحکام واپس لانے کے لئے سیاسی قربانی آپ کی حب الوطنی کاثبوت ہے، ملک کو ڈیفالٹ سے بچانے کی طرح اب عوام کو ڈیفالٹ سے بچانا بھی ہمارا بڑا امتحان ہے، سابق وزیراعظم کا مزید کہنا تھاکہ مسلم لیگ (ن) نے ہمیشہ مشکلات سے راستہ نکالا ہے،

وزیراعظم شہبازشریف نے پارٹی صدر کو قومی معاشی ایجنڈے کے خدوخال سے آگاہ کیا، قومی معاشی پلان کو حتمی شکل دینے کے بعد وزیراعظم شہباز شریف پارٹی صدر محمد نواز شریف کو بریف کریں گے،وزیراعظم شہبازشریف  کا کہنا تھا کہ ملک کے تمام مسائل کے حل کے لئے ایک جامع معاشی ایجنڈا تیار کرلیا ہے، 200 یونٹ تک پروٹیکٹڈ اور نان پروٹیکٹڈ بجلی صارفین کو تین ماہ کے لئے ریلیف دیا ہے، ترقیاتی بجٹ سے 50 ارب روپے کی کٹوتی کرکے 86 فی صد عوام کو ریلیف دیاگیا، اجلاس میں وزیراعلی پنجاب مریم نوازشریف اور دیگر پارٹی راہنما اور عہدیدار بھی موجود تھے۔