کیسز میں مسلسل اضافہ ، کل سے سال کی آخری انسداد پولیو مہم کا آغاز

(بابر شہزاد)وزیرِاعظم کی فوکل پرسن برائے انسدادِ پولیو عائشہ رضا فاروق  نے کہا ہے کہ انسدادِ پولیو مہم کل سے شروع ہوگی۔

 عائشہ رضا فاروق نے کہا کہ(کل) 16 سے 22 دسمبر تک ملک کے 143 مخصوص اضلاع میں انسداد پولیو مہم جاری رہے گی،مہم کے دوران 4 کروڑ 40 لاکھ سے زائد بچوں کو پولیو سے بچاؤ کے قطرے پلائے جائیں گے، 16 دسمبر سے سال 2024 کی آخری انسدادِ پولیو مہم کا آغاز کیا جارہا ہے،ہمارا عزم ہے کہ 5 سال تک کی عمر کے تمام بچوں تک ویکسین کی رسائی ممکن بنائی جائے،میں ایک ماں کی حیثیت سے آپ سے اپیل کرتی ہوں کہ پولیو ورکرز کے لئے اپنے دروازے کھولیں،اپنے پانچ سال تک کی عمر کے تمام بچوں کو پولیو سے بچاؤ کے قطرےلازمی پلوائیں،پولیو ویکسین مکمل طور پر محفوظ، مؤثر اور بالکل مفت فراہم کی جاتی ہے۔

پولیو سمیت دیگر مہلک بیماریوں سے تحفظ کے لیے حفاظتی ٹیکہ جات کا مکمل کورس کروانا بے حد ضروری ہے،مشکل حالات میں خدمات انجام دینے والے بہادر فرنٹ لائن ورکرز کو خراجِ تحسین پیش کرتی ہوں،پولیو کے خلاف جاری جدوجہد میں ہمارے فرنٹ لائن ورکرز حقیقی ہیرو ہیں۔

دوسری طرف ملک کے مزید 8 اضلاع کے سیوریج نمونوں میں پولیو وائرس کی تصدیق ہوئی ہے،قومی ادارہ صحت میں قائم ریجنل ریفرنس لیبارٹری نے تصدیق کی ہے،وائلڈ پولیو وائرس ٹائپ ون پہلے سے متاثرہ 7 اضلاع کے ماحولیاتی نمونوں میں پایا گیاہے،نئے کیسز کی تصدیق کے بعد پولیو وائرس متاثرہ اضلاع کی تعداد 83 ہو گئی ہے۔

پولیو وائرس پہلی مرتبہ ضلع چارسدہ، خیبر پختونخوا  میں رپورٹ ہوئے ہیں، قومی ادارہ صحت کے مطابق رواں سال ملک میں پولیو وائرس کے 63 کیسز رپورٹ ہوئے ۔