ڈونلڈ ٹرمپ پر ریپ کا الزام امریکی نیوز چینل کو مہنگا پڑ گیا

(24نیوز) ڈونلڈ ٹرمپ پر ریپ کا الزام امریکی نیوز چینل کے لئے بہت مہنگا ثابت ہوا ہے، نومنتخب امریکی صدر نے نیوز چینل پر ڈیڑھ کروڑ ڈالر ہرجانے کا دعویٰ کیا ہے۔

بین الاقوامی میڈیا چینل اے بی سی نیوز کے اینکر جارج سٹیفانوپولوس نے ٹرمپ پرمصنفہ ای جین کیرول کے ریپ کا الزام عائد کیاتھا، اینکر جارج سٹیفانوپولس نے یہ بات نینسی میس کے ساتھ انٹرویو میں کہی تھی، یہ محض الزام تھا جو کہ غلط ثابت ہوا ہے،  بین الاقوامی میڈیا کے مطابق اے بی سی نیوز نے اینکر جارج سٹیفانوپولوس کے غلط آن ایئر دعوے پر ہتک عزت کا مقدمہ طے کرنے کے لیے ٹرمپ کی صدارتی لائبریری کو 15 ملین ڈالر ادا کرنے پر رضامندی ظاہر کر دی ہے, نیوز آرگنائزیشن اور سٹیفانوپولوس عوامی سطح پر یہ کہتے ہوئے معافی بھی مانگیں گے کہ اس نے مذکورہ انٹرویو کے دوران ٹرمپ کے بارے میں غلط بیانات دیے ہیں،  یہ نیٹ ورک ٹرمپ کے وکیل کی قانونی فرم کو 1 ملین ڈالر کی قانونی فیس بھی ادا کرے گا، اے بی سی نیوز کی ترجمان جینی کیڈاس نے کہا ہمیں خوشی ہے کہ فریقین عدالت میں دائر مقدمہ خارج کرنے کے لیے ایک معاہدے پر پہنچ گئے ہیں۔

یاد رہے کہ یہ مقدمہ اینکر جارج سٹیفانوپولس کے آن ایئر تبصروں سے شروع ہوا تھا، جنھوں نے مارچ میں امریکی نمائندے نینسی میس کے ساتھ نشر ہونے والے انٹرویو کے دوران کہا تھا کہ ڈونلڈ ٹرمپ ریپ کے ذمہ دار ہیں، اینکر جارج سٹیفانوپولس نے کہا تھا کہ ڈونلڈ ٹرمپ مصنفہ ای جین کیرول کی عصمت دری کے لیے شہری طور پر ذمہ دار پائے گئے ہیں اور وہ متاثرہ خاتون کو بدنام کر رہے ہیں، حالاں کہ نیویارک کے قانون کے مطابق اس کیس میں ایسا کوئی عدالتی فیصلہ سامنے نہیں آیا تھا۔