پُرامن پاکستان کیلئے علماء کرام کو اپنا مثبت کردار ادا کرنا ہوگا، محسن نقوی

(24 نیوز) نگران وزیراعلیٰ پنجاب سید محسن رضا نقوی کی زیر صدارت اتحادبین المسلمین کمیٹی پنجاب کا اجلاس ہوا جس میں تمام مکاتب فکر کے ستر سے زائد جید علماء کرام کی شرکت کی۔

اجلاس میں محرم الحرام کے دوران امن عامہ برقرار رکھنے کیلئے حکومت کی جانب سے ہرممکن تعاون کا یقین دلایا گیا۔

وزیراعلیٰ محسن نقوی کی جانب سے اتحاد بین المسلمین کمیٹی کو قانونی حیثیت دینے کا فیصلہ بھی کیا گیا۔ اسکے علاوہ فیصلہ کیا گیا کہ اتحاد بین المسلمین کمیٹی کا اجلاس سال میں کم از کم 4 مرتبہ ہوگا۔

اس موقع پر وزیر اعلیٰ کا کہنا تھا کہ اتحاد بین المسلمین کے فورم کو فعال اور مضبوط ہونے سے علماء کرام اور حکومت کے درمیان اشتراک کار بہتر ہوگا، علماء کی خدمات کی قدر کرتے ہیں، مذہبی جذبات کا احترام ضروری ہے۔

یہ بھی پڑھیے: محرم الحرام کی آمد، پاک فوج اور رینجرز کو طلب کرنے کی سمری ارسال

ان کا مزید کہنا تھا کہ پُرامن پاکستان کیلئے علماء سمیت سب کو اپنا مثبت کردار ادا کرنا ہوگا۔

اجلاس میں سویڈن میں توہین قرآن اور بائبل کو جلائے جانے کی اجازت کے عدالتی فیصلے اور اقوام متحدہ ہیومن رائٹس کونسل میں اسرائیل کی طرف سے پاکستان کے بارے میں ہرزہ سرائی کی مذمت بھی کی گئی۔

مذکورہ اجلاس میں 9 مئی کے واقعات اور فوجی تنصیبات پر حملو ں کی شدید مذمت کی گئی۔

اس موقع پر مولانا عبدالخبیر آزاد نے کہا کہ علماء امن کی کاوشوں میں کندھے سے کندھا ملا کر کھڑے ہیں، امن و امان کیلئے فراخدلی کا مظاہرہ بے حد ضروری ہے۔

اجلاس میں اتحاد بین المسلمین کمیٹی کے علماء کرام اور مشائخ عظام نے تجاویز بھی پیش کیں جس پر وزیراعلیٰ محسن نقوی نے تمام تجاویز کو خود نوٹ کیا اور قابل عمل تجاویز پر عملدرآمد کی یقین دہانی کرائی۔