افغان حکومت میں اختلافات، وزیر داخلہ عہدے سے مستعفی

 (24 نیوز)افغانستان کی حکومت میں اختلافات سامنے آ گئے، وزیر داخلہ سراج الدین حقانی نے اپنے عہدے سے استعفیٰ دے دیا۔

افغان میڈیا کے مطابق سراج الدین حقانی نے افغان طالبان کے سربراہ ہیبت اللہ اخوندزادہ کو استعفیٰ بھجوا دیا جو انہوں نے منظور کر لیا ہے۔

طالبان قیادت کے اندرونی اختلافات استعفے کی وجہ بتائی جا رہی ہے اور سراج الدین حقانی کی وزارت کی ذمہ داریوں سے طویل غیرحاضری بھی استعفے کی وجہ ہے۔

حقانی نیٹ ورک اور طالبان کی مرکزی قیادت کے درمیان خواتین کے حقوق کے معاملے پر بھی اختلافات ہیں۔

میڈیارپورٹ میں کہا گیا ہے کہ سراج الدین حقانی کے مستعفی ہونے سے متعلق طالبان حکومت کا کوئی بیان نہیں آیا۔

دوسری جانب افغان طالبان کی جانب سے سراج الدین حقانی کے مستعفی ہونے کی تصدیق یا تردید نہیں ہوسکی ہے۔

گزشتہ روز سراج الدین حقانی نے صوبہ خوست کا دورہ کیا تھا اور جمعہ کی نماز ادا کی جہاں انہوں نے شہریوں سے بھی ملاقات کی تھی۔