عدنان صدیقی کی شاہ چارلس سے یادگارملاقات،تصاویرشیئرکردیں

 (ویب ڈیسک) معروف اداکار عدنان صدیقی کو برطانوی بادشاہ چارلس سوم سے ملاقات کا موقع مل گیاجس کی تصاویرانہوں نے بذریعہ سوشل میڈیا اپنے مداحوں کے ساتھ شیئرکردیں۔

عدنان صدیقی نے فوٹو اینڈ ویڈیو شیئرنگ پلیٹ فارم انسٹاگرام پر بکنگھم پیلس میں ہونے والی اس مختصرملاقات کا احوال شیئرکیاہے،شیئرکی گئی مختلف تصاویرمیں انہیں اور شاہ چارلس سوم کو خوشگوار انداز میں ایک دوسرے سے گفتگو کرتے ہوئے دیکھا جا سکتا ہے۔

عدنان صدیقی نے سوشل میڈیا پر پوسٹ شیئر کرتے ہوئے کیپشن میں لکھا کہ ہماری گفتگو مختصر لیکن متحرک تھی، پلک جھپکتے ہی مختلف دنیاؤں کی ملاقات کی طرح، شاہ چارلس سوم میں لوگوں کو پُرسکون رکھنے کی ایک منفرد صلاحیت تھی، جس نے ایک دیرپا تڑپ چھوڑ دی ہے۔

معروف اداکار کا کہنا ہے کہ ایسا ہر روز نہیں ہوتا کہ آپ کسی ایسے شخص سے ملاقات کریں اور اس مختصر ملاقات کے بعد بھی اس کا خیال آپ کے ذہن میں ایسے ہی تازہ رہے جیسے وہ ابھی کی بات ہو۔

View this post on Instagram

A post shared by Adnan Siddiqui (@adnansid1)

عدنان صدیقی نے انسٹا اسٹوری میں کنگ چارلس کی جانب سے موصول ہونے والے دعوت نامے کی تصویر بھی پوسٹ کی ہے،مذکورہ دعوت نامے کے مطابق 13 نومبر 2024ء کو بکنگھم پیلس میں منعقدہ تقریب میں برطانوی شاہ اور ملکہ کی جانب سے فلم اور ٹیلی ویژن انڈسٹری میں نمایاں کارکردگی کا مظاہرہ کرنے والی شخصیات کی خدمات کے اعتراف میں استقبالیے کا اہتمام کیا گیا تھاجس میں پاکستان سے عدنان صدیقی مدعو تھے۔

عدنان صدیقی نے اداکاری کا آغاز 1994ء میں پی ٹی وی کے ڈرامے "عروسہ" سے کیا تھاجس کے بعد انہوں نے ناصرف لالی ووڈ اور بالی ووڈ اور ہالی ووڈ میں بھی اداکاری کے جوہر دکھائے ہیں۔