شنگھائی تعاون تنظیم کا سربراہی اجلاس آج، بھارت سمیت دیگر ممالک کے وفود پہنچ گئے

اسلام آباد میں شنگھائی تعاون تنظیم کا تیسواں سربراہی اجلاس کامیابیاں سمیٹتے ہوئے اختتام پذیر ہوگیا، ایس سی او اجلاس کے کامیاب انعقاد پر ریاست داد کی مستحق ہے۔ چین، روس، بھارت، ایران، کرغستان، قازقستان، تاجکستان، ازبکستان اور بیلاروس کے سربراہان نے  اجلاس میں شرکت کی جبکہ منگولیا جوکہ ایس سی او کی ممبرشپ میں دلچسپی رکھتا ہے بطور مبصر شریک ہوا۔ وزیراعظم پاکستان میاں شہباز شریف نے افتتاحی خطاب میں مہمانوں کو پاکستان آنے پر خوش آمدید کہتے ہوئے کہا کہ ایس سی او ممالک دنیا کی آبادی کا 40 فیصد ہیں جو مل کر خطے کی معیشت کو بہتر بنا سکتے ہیں، خطے کی عوام کے بہتر معیار زندگی اور سہولیات کیلئے معاشی ترقی، خوشحالی اور استحکام کی کوششیں مل کر کرنا ہوں گی۔ شہباز شریف نے کہا پاکستان خطے میں امن چاہتا ہے، یقینی بنانا ہوگا کہ افغان سرزمین کسی ملک میں دہشتگردی کیلئے استعمال نہ ہو، عالمی برادری انسانی ہمدردی کی بنیادوں پر افغانستان میں امداد پر توجہ دے۔ وزیراعظم پاکستان شہباز شریف نے کہا غربت کے خاتمے کیلئے ایس سی او ممالک کو ایک ساتھ مل کر اقدامات کرنا ہوں گے، خطے میں ٹرانسپورٹ اور توانائی کے شعبے میں تعاون کے وسیع مواقع موجود ہیں۔ پرائم منسٹر نے کہا پاکستان اقتصادی راہداری کے دوسرے مرحلے میں داخل ہو رہا ہے، علاقائی ترقی کیلئے 'بیلٹ اینڈ روڈ' منصوبہ انتہائی اہمیت کا حامل ہے، سی پیک کے عالمی شمال جنوبی ٹرانسپورٹ ریڈار کو پھیلایا جائے، سڑکیں، ریل اور انفراسٹرکچر کو ترقی دی جائے تاکہ علاقائی ممالک میں تعاون بڑھایا جائے۔

شنگھائی تعاون تنظیم اجلاس میں چین، روس اور پاکستان سمیت 8 ممالک کے وزرائے اعظم، بھارتی وزیر خارجہ جے شنکر، عالمی مندوبین اور رہنماؤں نے شرکت کی۔ معیشت کی بحالی اور  مستحکم تجارتی تعلقات کیلئے شنگھائی تعاون تنظیم کی میزبانی پاکستان کیلئے سود مند ثابت ہوئی جوکہ وقت کی ایک اہم ضرورت تھی، حکومت پاکستان کیجانب سے آنے والے معزز مہمانوں کیلئے عالمی معیار کے بہترین انتظامات دیکھنے کو ملے۔ شنگھائی تعاون تنظیم اجلاس میں 'ایک زمین، ایک خاندان اور ایک مستقبل' کے نعرے کے تحت تجارت، معیشت، ثقافت، ماحولیات، سیکیورٹی معاملات، رکن ممالک کے درمیان باہمی تعاون اور تنظیم کے بجٹ کے علاوہ اہم تنظیمی امور پر گفتگو کی گئی۔ شنگھائی تعاون تنظیم ایک اہم پلیٹ فارم ہے، ایس سی او کے رکن ممالک ایک بہت بڑا اقتصادی بلاک ہیں جس کا پاکستان نے بھرپور فائدہ اٹھاتے ہوئے تجارتی معاہدوں پر دستخط کرکہ اپنے معاشی مفادات کا تحفظ کیا ہے۔ پاکستان اس سے قبل ایس سی او کے فورم پر گوڈ سیکیورٹی، موسمیاتی تبدیلی اور دہشت گردی کے شعبوں میں اپنا کردار ادا کرتا رہا ہے۔ پاکستان نے خطے میں رابطوں اور ماحولیاتی تبدیلی کے میدان میں کردار ادا کرکہ ایس سی او میں اپنی اہمیت ثابت کی ہے۔

شنگھائی تعاون تنظیم اجلاس میں شرکت کی غرض سے 11 سال کی طویل مدت بعد کسی چینی وزیراعظم کے دورہ پاکستان پر چینی وزیراعظم لی چیانگ کا پرتپاک استقبال کیا گیا،  وزراء اور اعلی حکام پرمشتمل ایک بڑے وفد کے ہمراہ ایس سی او اجلاس سے 1 روز قبل پاکستان آمد نے ان کے دورے کی اہمیت اور اہداف کو واضح کردیا۔  وزیراعظم لی چیانگ نے دورے کے پہلے روز ہی  ایوان وزیراعظم میں استقبالیہ تقریب میں شرکت کی جہاں سیکیورٹی، تعلیم، ذراعت، مواصلات، صنعت و تجارت، انسانی وسائل کی ترقی،سائنس و ٹیکنالوجی اور کرنسی تبادلے سمیت متعدد شعبوں میں 13 مفاہمت کی یاد داشتوں اور معاہدوں پر دستخط کیے گئے۔ اسی دوران چینی وزیراعظم نے میاں شہباز شریف کے ہمراہ  گوادر انٹرنیشنل ائیرپورٹ کا ورچوئل افتتاح بھی کیا، مسٹر لی چیانگ نے پاکستان کے ساتھ سٹریٹیجک پارٹنرشپ کو مزید گہرا اور مظبوط کرنے کے عزم کا بھی اظہار کیا۔ چینی وزیراعظم کے دورہ پاکستان کے دوران سی پیک فیز 2 کے تحت شروع کیے گئے منصوبوں کی تیزی سے تکمیل پر مشاورت اور   اسلام آباد میں منعقدہ ایس سی او اجلاس میں شرکت سے نہ صرف چین اور پاکستان کے مفادات کو تحفظ حاصل ہوگا بلکہ عالمی سطح پر بھی اس کے خوشگوار اثرات مرتب ہوں گے۔

روس کے وزیراعظم میخائل میشوستین جوکہ شنگھائی تعاون تنظیم اجلاس کی شرکت سے اسلام آباد پہنچے تھے تاہم ان کی وزیراعظم شہباز شریف سے ملاقات میں دو طرفہ تعلقات پر غیررسمی گفتگو بھی اہمیت کی حامل رہی، تو دوسری جانب بھارت کیجانب سے وزیرخارجہ سبرامنیم جے شنکر نے نمائندگی کی۔ پاک بھارت باہمی تعلقات میں گزشتہ 5 برس سے چلی آنے والی سرد مہری کے پیش نظر اسلام آباد میں ایس جے شنکر کی موجودگی اور ایس سی او میں شرکت کو سراہا جا رہا ہے، بھارتی وزیرخارجہ ایک ملٹی لیٹرل کانفرنس میں شرکت کیلئے آئے تھے اور پاکستانی حکام سے دوطرفہ معاملات پر ملاقات ایجنڈے میں شامل نہ تھی لیکن جے شنکر کی ایس سی او میں شرکت کو دونوں ملکوں کے تعلقات کو ایک حوصلہ افزا اور مثبت اشارہ سمجھا گیا ہے۔ بھارتی وزیرخارجہ نے واپس جاتے ہوئے وزیراعظم پاکستان کا  بہترین مہمان نوازی پرشکریہ ادا کیا جوکہ ایک غیر معمولی اور خوشگوار حیرت کا احساس ہے تاہم دونوں ہمسایہ ممالک کے مابین اچھے تعلقات قائم ہونے سے خطے میں تجارت کو فروغ، گھٹن بھرے ماحول کو راحت اور کاروباری افراد کو بہتر سرمایہ کاری مواقع دستیاب ہوں گے۔ 

شنگھائی تعاون تنظیم اجلاس میں ایس سی او کے دو اہم ترین رکن ممالک، جو دراصل اس تنظیم کے روح رواں، اقوام متحدہ میں سپر پاور اور ویٹو پاور بھی ہیں، یعنی چین اور روس کے وزرائے اعظم کی شرکت سے اجلاس کی اہمیت میں گراں قدر اضافہ ہوا ہے۔ دو ویٹو پاور کا پاکستان میں موجود ہونا بلاشبہ نہ صرف پاکستان کی کامیاب سفارتکاری اور واضح حکمت عملی ہے بلکہ عالمی سطح پر پاکستان کی جانب سے جانے والا ایک سٹرونگ میسج بھی ہے جو پاکستان کے مثبت کردار اور بہتر امیج کی ترجمانی کرتا ہے کہ پاکستان خطے میں امن کا سفیر اور بین لاقوامی تعلقات کا داعی ہے۔ ملائیشین وزیراعظم داتو سری انور ابراہیم کا حالیہ دورہ پاکستان، سعودی مملکت کے وزیر سرمایہ کاری خالد بن عبدلعزیز  الفالح کے دورہ پاکستان کے دوران 2.2 ارب ڈالر مالیت کے منصوبوں اور مفاہمت کی یادداشتوں پر دستخط اور اب کامیاب شنگھائی تعاون تنظیم اجلاس پاکستان کے روشن مستقبل کی ضمانت، ترقی کی جانب ایک اور قدم اور پاکستان کو عالمی سطح پر تنہا دیکھنے والے دشمنوں کا لگنے والی کاری ضرب ہے جو یقینا حکومت، اداروں اور پاکستانی قوم کی بڑی کامیابی ہے۔

(24 نیوز) بھارتی وزیر خارجہ جے شکر نے کہا ہے کہ ایس سی او اجلاس کی کامیاب میزبانی پر پاکستان کو مبارکباد پیش کرتا ہوں،ہم ایسے وقت میں مل رہے ہیں جب دنیا بھر میں حالات پیچیدہ ہیں۔

بھارتی وزیر خارجہ جے شکر نے شنگھائی تعاون تنظیم کے اجلاس سے خطاب کرتے ہوئے کہا کہ ایس سی او اجلاس کی کامیاب میزبانی پر پاکستان کو مبارکباد پیش کرتا ہوں، بھارت نے اس صدارت کو کامیاب بنانے کیلئے اپنی مکمل حمایت فراہم کی۔

انہوں نے کہا کہ ہم ایسے وقت میں مل رہے ہیں جب دنیا بھر میں حالات پیچیدہ ہیں، ہم دنیا کے مشکل وقت سے گزر رہے ہیں، دنیا میں بڑی جنگیں جاری ہے جس کے عالمی سطح پر خطرناک اثرات مرتب ہو رہے ہیں،کورونا نے دنیا میں ترقی پذیر ممالک کو تباہ کیا، موسمیاتی تبدیلیوں نے معاشی طور پر اثر انداز کیا، قرضوں کی وجہ سے ایس جی ڈیز گولز حاصل کرنے میں ناکامی کا سامنا ہے، قرضوں کا بوجھ سنگین مسئلہ ہے۔

بھارتی وزیر خارجہ جے شنکر نے مزید کہا کہ ایس سی او کا مقصد ہے کہ وہ باہمی اعتماد کو تقویت دیں، دوستی کو فروغ دیں اور اچھے ہمسایوں کی طرح رہیں، ایس سی او کے چارٹر آرٹیکل ون میں ان تمام باتوں کا ذکر ہے، ضروری ہو چکا ہے کہ ہم ایماندارانہ بات چیت کریں، اگر اعتماد اور تعاون میں کمی ہے تو ان کو دور کرنے کی ضرورت ہے۔

یاد رہے کہ شنگھائی تعاون تنظیم کے مہمانوں کے اعزاز میں وزیراعظم ہاؤس اسلام آباد میں عشائیہ دیا گیا،وزیراعظم شہباز شریف نے مہمانوں کو خوش آمدید کہا۔ اس دوران بھارتی وزیر خارجہ سبرامنیم جے شنکر اور وزیراعظم شہباز شریف کے درمیان مصافحہ اور خوشگوار جملوں کا تبادلہ ہوا۔

عشائیے میں چین، روس، تاجکستان، کرغزستان، قازقستان، بیلا روس کے وزرائے اعظم اور ترکمانستان کے وزیر خارجہ سمیت مہمان شریک ہوئے،وزیراعظم نے اجلاس میں شرکت پر خیرمقدم کیا اور شنگھائی تعاون تنظیم کے اصولوں اورمقاصد کو آگے بڑھانے کے عزم کا اعادہ کیا۔ مہمانوں نے ایس سی او سربراہی اجلاس کے کامیاب انعقاد پروزیراعظم کو مبارک باد دی۔

(24 نیوز)شنگھائی تعاون تنظیم کے اجلاس کے موقع پر وفاقی دارالحکومت اسلام آباد میں سیکیورٹی کے سخت انتظامات کیے گئے ہیں۔

دارالحکومت میں 30 ایڈیشنل ناکے لگا دیے گئے، جہاں پر 1287 افسران و اہلکار تعینات کئے گئے ہیں، ناکوں کی نگرانی 4 ایس پی جبکہ 43 ڈی ایس پی کر رہے ہیں۔شہر کو دلہن کی طرح سجایا گیا ہے۔

 روسی وزیراعظم میخائل مشوستن اور ازبکستان کے وزیراعظم عبداللہ اریپوف بھی پاکستان پہنچ گئے تھے، نور خان ایئر بیس پر وزیر دفاع خواجہ محمد آصف نے روسی وزیراعظم کا استقبال کیا، اس موقع پر روایتی لباس میں ملبوس بچوں نے معزز مہمان کوگلدستے پیش کیے۔

ایران کے وزیر صنعت کان کنی و تجارت سید محمد اتابک بھی شنگھائی تعاون تنظیم سربراہی اجلاس میں شرکت کے لیے اسلام آباد پہنچ گئے،آج علی الصبح ازبکستان کے وزیراعظم عبداللہ اریپوف بھی پاکستان پہنچ گئے، وفاقی وزیر اویس لغاری نے نور خان ایئر بیس پر ان کا استقبال کیا۔

ضرورپڑھیں:27 سال بعد بڑا عالمی اجلاس،8 ممالک کی اعلیٰ شخصیات اسلام آباد جمع،وزیراعظم شہبازشریف خطاب کررہے ہیں
 

اجلاس کی اہمیت اور دونوں ممالک کے درمیان باہمی تعلقات کے تناظر میں معزز مہمان کا ریڈ کارپٹ استقبال کیا گیا، دونوں رہنمائوں کے درمیان خیرسگالی کے کلمات کا اظہار بھی کیا گیا۔کانفرنس میں شرکت کے لیے آنے والے سربراہان مملکت اور غیرملکی وفود کے استقبال کے لیے شہر بھر کو رنگ برنگی روشنیوں اور پھولوں اور ایس سی او کے رکن ممالک کے جھنڈوں سے سجایاگیا ہے۔

(انورعباس)شنگھائی تعاون تنظیم سربراہ اجلاس،رکن ممالک کا غیر امتیازی اور شفاف تجارتی نظام کے قیام کی ضرورت پر زور،ایس سی او تنظیم کا مشترکہ اعلامیہ جاری کردیا گیا،ون ارتھ ، ون فیملی اور ون فیوچر پر زور،اعلامیہ میں فورم نے یکطرفہ تجارتی پابندیاں لگانے کی مخالفت کر دی، اعلامیہ میں کہا گیا ہے کہ یکطرفہ پابندیاں ورلڈ ٹریڈ آرگنائزیشن کے قوانین کیخلاف ہیں،رکن ملکوں کے درمیان8دستاویزات پر دستخط،ایس سی او سربراہان حکومت کی صدارت روس کے سپرد،،آئندہ اجلاس کی 2025 میں روس میزبانی کرے گا۔

شنگھائی تعاون تنظیم کے 23 سربراہان حکومت اجلاس کا مشترکہ اعلامیہ جاری کر دیا گیا،اعلامیہ میں کہا گیا ہے کہ شنگھائی تعاون تنظیم کا 23واں سربراہی (وزراء اعظم) اجلاس اسلام آباد میں منعقد ہوا،ایس سی او ممالک کا ون ارتھ ۔ون فیملی اور ون فیوچر پر زور دیا گیا ،فورم نے غیر امتیازی اور شفاف تجارتی نظام کے قیام کی ضرورت پر زور دیا۔
مشترکہ اعلامیہ میں کہا گیا ہے کہ فورم نے یکطرفہ تجارتی پابندیاں لگائے جانے کی مخالفت کی، یکطرفہ پابندیاں ورلڈ ٹریڈ آرگنائزیشن کے قوانین کے خلاف ہیں،پاکستان، کرغیزستان، بیلاروس ، قازقستان، روس اور ازبکستان نے چین کے بیلٹ اینڈ روڈ انی شی ایٹو کی حمایت کی،فورم کی یورپ اور ایشیاء کے مابین بہتر اقتصادی اشتراک کی ضرورت پر زور دیا،گرین ڈویلپمنٹ، ڈیجیٹل اکانومی، تجارت، سرمایہ کاری، ٹیکنالوجی کے شعبوں میں رکن ممالک کے استعداد کار بڑھانے پر زور، رکن ممالک میں جاری سرمایہ کاری منصوبوں کے لئے ڈیٹا بینک بنانے کی تجویز پر زوردیا گیا ہے۔

ایس سی او سربراہان حکومت کی صدارت روس کے سپرد کر دی گئی ۔آئندہ اجلاس کی 2025 میں روس میزبانی کرے گا ۔

اس سے قبل جناح کنونشن سینٹر پہنچنے والے مہمانوں کا وزیر اعظم شہباز شریف نے استقبال کیا ،ایس سی او سیکریٹری جنرل، ایران کے وزیرصنعت سید محمد اتابک، منگولیا کے وزیراعظم ایون اردین، بھارتی وزیر خارجہ جے شنکر، ترکمانستان کے وزیر خارجہ راشد میر یدوف بھی کنونشن سینٹر اسلام آباد پہنچ گئے، وزیراعظم شہباز شریف نے ان کا استقبال کیا،اس کے بعد قازقستان کے وزیراعظم اولژاس بیک تینوف بھی کانفرنس ہال پہنچ گئے۔

وزیراعظم شہباز شریف جناح کنونشن سینٹر ، اسلام آباد میں ہونے والے شنگھائی تعاون تنظیم کونسل آف ہیڈز آف گورنمنٹ کے 23 ویں اجلاس کی صدارت کریں گے،ایس سی او اجلاس کے لیے وفاقی دارالحکومت اسلام آباد میں سکیورٹی کے انتہائی سخت انتظامات کیے گئے ہیں اور دارالخلافہ کو دلہن کی طرح سجایا گیا ہے۔ 

شنگھائی تعاون تنظیم کے اجلاس میں چین کے وزیراعظم لی چیانگ، روس کے وزیراعظم میخائل مشوستن، تاجکستان کے وزیراعظم خیر رسول زادہ، کرغزستان کے وزیراعظم زاپاروف اکیل بیگ، بیلا روس کے وزیراعظم رومان گولوف چینکو، قازقستان کے وزیراعظم اولڑاس بینکتینوف، تاجکستان کے وزیراعظم کوہر رسول زادہ اور ازبکستان کے وزیراعظم عبد اللہ ارپیوف شریک ہوں گے،اس کے علاوہ ایران کے نائب صدر محمد عارف اور بھارتی وزیر خارجہ جے شنکر بھی ایس سی او کانفرنس میں شریک ہیں جبکہ منگولیا مبصر ملک کے طور پر شریک ہے جس کی نمائندگی منگولین وزیراعظم کر رہے ہیں۔

وزیر اعظم کا خطاب
وزیر اعظم نے ایس سی او اجلاس سے افتتاحی خطاب کرتے ہوئے کہا کہ اپنے معزز مہمانوں کو دارالحکومت اسلام آباد میں خوش آمدید کہتے ہوئے  انتہائی خوشی محسوس ہو رہی ہے، ہم سربراہان مملکت کی ایس سی او کونسل کی شاندار تقریب کی میزبانی کو اپنے لیے اعزاز سمجھتے ہیں جو دنیا کی 40فیصد آبادی کی آواز تصور کی جاتی ہے۔

انہوں نے کہا کہ آپ کی یہاں موجودگی ہمارے عوام کی امنگوں پر پورا اترنے کے ہمارے مشترکہ عزم کی عکاسی کرتی ہے تاکہ ہم ایس سی او خطے کی پائیدار ترقی اور خوشحالی کے لیے مجموعی سیکیورٹی اور دوطرفہ مفاد پر مبنی تعاون کو فروغ دے سکیں۔

ان کا کہنا تھا کہ آج کی میٹنگ ہماری متنوع قوم کے درمیان ہمارے تعلقات اور تعاون کو مضبوط کرنے کا ایک اور ثبوت ہے جہاں ہم مل کر سماجی معاشتی ترقی، علاقائی امن و استحکام اور اپنے شہریوں معیار زندگی کو بہتر بنا سکتے ہیں۔

شہباز شریف نے کہا کہ آئیں اس موقع سے فائدہ اٹھاتے ہوئے اسے بہترین آئیڈیاز اور بہترین اقدامات کے اشتراک اور ٹھوس اقدامات مرتب کرنے کے لیے استعمال کریں جو ہماری معیشتوں اور معاشرے کے لیے سودمند ثابت ہوں۔

واضح رہے کہ پاکستان اِس وقت میزبانی کا گڑھ بن چکا ہے ، شہر اقتدار میں شنگھائی تعاون تنظیم کا اہم اجلاس ہورہا ہے جس میں 8 ممالک کی اعلیٰ شخصیات شامل ہیں۔پاکستان میں 27 سال بعد اس سطح کے ایونٹ کے ہونے سے واضح ہورہا ہے کہ پاکستان ایک امن پسند اور محفوظ ملک ہے جو اِس طرز کے بڑے ایونٹ کی میزبانی کرنے کی صلاحیت رکھتا ہے ۔اب شنگھائی تعاون تنظیم کے سربراہی اجلاس کا پاکستان میں ہونا کامیاب خارجہ پالیسی کا نتیجہ قرار دیا جارہا ہے۔

یہ اجلاس پاکستان کیلئے معاشی اور سفارتی اور سیکیورٹی کے لحاظ سے اہمیت کا حامل تصور کیا جارہا ہے۔درحقیقت پاکستان کے لیے یہ اجلاس ایک منفرد سفارتی موقع ہے ۔خصوصی طور پر ایک ایسے وقت میں جب دنیا بھر کے ممالک اپنے اتحادی اور اسٹریٹجک حکمت عملی تبدیل کررہے ہیں۔ چین کا بڑھتا عالمی اثرورسوخ، روس کا ایشیا کی جانب بڑھتا جھکاؤ اور وسطی ایشیا کی بڑھتی ہوئی اہمیت، پاکستان کو موقع فراہم کرتی ہے کہ ایس سی او کے ذریعے عالمی سطح پر خود کو ثابت کرے۔شنگھائی تعاون تنظیم میں پاکستان کے لیے قومی سلامتی کے مسائل کو بھی حل کرنے کی گنجائش نکل سکتی ہے۔ پاکستان ہمیشہ سے اندرونی سیکیورٹی مسائل کا سامنا کرتا رہا ہے۔ ایسے میں ایس سی او کا علاقائی انسدادِ دہشت گردی پر کام کرنے والا فورم، پاکستان کو سلامتی کے خطرات سے نمٹنے کے لیے علاقائی قوتوں کے ساتھ مل کر کام کرنے کے لیے ایک قابل قدر موقع فراہم کرتا ہے۔ پھر اِسی طرح ایس سی او جیسے کثیرالجہتی پلیٹ فارم میں متحرک کردار ادا کرکے پاکستان اقتصادی فوائد اور سفارتی سرمایہ دونوں حاصل کرسکتا ہے۔

پاکستان کو اس وقت سنگین معاشی چیلنجز بھی درپیش ہیں ۔ ملکی معیشت آئی ایم ایف اور دوست ممالک کے قرضوں کے سہارے چل رہی ہے۔یعنی ایک طرح سے معیشت مفلوج ہے جس کی وجہ سے ملک کو نئے معاشی شراکت داروں کی اشد ضرورت ہے۔ ایسے میں ایس سی او کانفرنس میں شریک ممالک پاکستان کیلئے معاشی اعتبار سے فائدے مند ثابت ہوسکتے ہیں ۔پاکستان اِن ممالک کے ذریعے اپنی برآمدات اور سرمایہ کاری کو تقویت دے سکتا ہے ۔جس کے بعد پاکستان کی معیشت قرضوں سے ہمیشہ ہمیشہ کیلئے چھٹکارا حاصل کرسکتی ہے ۔ایس آئی ایف سی کے تحت پاکستان شنگھائی تعاون تنظیم کے دیگر ممالک کے ساتھ سرمایہ کاری کو بڑھا سکتا ہے ۔ جیسا کہ ابھی وزیر اعظم شہباز شریف کے چینی وزیر اعظم کے ساتھ 13 شعباجات میں ایم اوز سائن ہوئے جو کہ پاکستان کی معیشت کیلئے تازہ ہوا کا جھونکا ہے ۔کہنے کا مقصد صرف اِتنا ہے کہ یہ اجلاس پاکستان کو معاشی طور پر خود کفیل ہونے کا ذریعہ بن سکتا ہے اور آرمی چیف جنرل عاصم منیر بھی اِس اجلاس کو معاشی اعتبار سے اہمیت کا حامل تصور کرتے ہیں ۔دراصل چینی وزیراعظم لی چیانگ کے اعزاز میں صدر مملکت آصف علی زرداری نے ظہرانہ دیا۔

ضرورپڑھیں:بلاول بھٹو اورمولانا فضل الرحمان آج لاہور میں نوازشریف سے ملاقات کریں گے

 ظہرانے کی دعوت میں آرمی چیف جنرل عاصم منیر نے بھی شرکت کی۔اِس موقع پر صحافیوں نے آرمی چیف سے پوچھا کہ ایس سی او کانفرنس سے آپ کیا توقعات رکھتے ہیں؟جس پر آرمی چیف نے جواب دیا کہ ہمارا ایجنڈا صرف پاکستان ہے ہم صرف پاکستان کو دیکھ رہے ہیں اور اسی کی کامیابی چاہتے ہیں۔اب آرمی چیف کے ساتھ ساتھ کاروباری شخصیات شنگھائی تعاون تنظیم اجلاس کے ذریعے ملک کی معیشت میں استحکام کے لیے پر امید ہیں۔لاہور چیمبر آف کامرس اینڈ انڈسٹری کے صدر میاں ابوزر شاد نے ایک بیان میں کہا کہ ایس سی او اجلاس عالمی شراکت داروں خاص طور پر چین کے ساتھ پاکستان کے تجارتی واقتصادی تعلقات مضبوط کرنے کا موقع فراہم کرے گا۔پھر اِسی طرح فیڈریشن آف پاکستان چیمبرز آف کامرس اینڈ انڈسٹری کے صدر عاطف اکرام شیخ کہتے ہیں کہ سی پیک کا دوسرا مرحلہ اور ایس سی او سربراہی اجلاس قومی معیشت کے لیے حقیقی گیم چینجر ثابت ہو سکتے ہیں۔

(24نیوز)کرغزستان کے وزیرِ اعظم شنگھائی تعاون تنظیم (ایس سی او) سمٹ میں شرکت کیلئے پاکستان پہنچ گئے۔

وفاقی وزیر پیٹرولیم مصدق ملک نے کرغزستان کے وزیرِ اعظم کا استقبال کیا،شنگھائی تعاون تنظیم (ایس سی او) کے رکن ممالک کے سربراہان حکومت کی کونسل کا 23 واں اجلاس آج وفاقی دارالحکومت میں شروع ہو گا۔

اجلاس کے موقع پر شہر بھر کے اہم مقامات کو رنگ برنگی روشنیوں اور پاکستانی جھنڈوں سے سجایا گیا ہے۔

ایس سی او کے اجلاس میں رکن ممالک کے رہنما ہاہمی تعاون کو مزید بڑھانے اور تنظیم کے بجٹ کی منظوری کے لیے اہم تنظیمی فیصلے کریں گے۔