عراق میں ریت کا طوفان،ہزاروں افراد ہسپتال پہنچ گئے، ہوائی اڈے بند

(ویب ڈیسک) عراق کے جنوبی اور وسطی علاقوں میں شدید ریت کے طوفان نے زندگی مفلوج کرکے رکھ دی، 3,700 سے زائد افراد کو سانس کی تکلیف کے باعث ہسپتال داخل کرادیا گیا، جبکہ بصرہ اور نجف کے ہوائی اڈے  بند کر دیے گئے ہیں۔

عراقی وزارت صحت کے مطابق دارالحکومت بغداد میں 1,014 افراد، جبکہ المُثنّی صوبے میں 874 مریض رجسٹر ہوئے۔ ترجمان سیف البدَر کے مطابق زیادہ تر مریضوں کو گردوغبار کے باعث سانس کی تکلیف کا سامنا ہوا، تاہم کوئی ہلاکت رپورٹ نہیں ہوئی۔

ریسکیو اہلکاروں نے ویل چیئر پر موجود افراد کو سڑک عبور کرانے میں مدد دی، جبکہ شہری ماسک پہن کر سنسان سڑکوں پر چلتے نظر آئے۔ ہوا میں گرد اتنی زیادہ تھی کہ نظریں بمشکل ایک کلومیٹر سے آگے دیکھ سکتی تھیں۔

ماہرین کے مطابق عراق میں ریت کے طوفان عام ہیں لیکن ماحولیاتی تبدیلی اور صحراؤں کے پھیلاؤ کے باعث ان کی شدت میں اضافہ ہو رہا ہے۔ 

 یہ بھی پڑھیں:بلوچستان میں چلنے والی ٹرینوں کی سیکیورٹی کیلئے نیا پلان تشکیل دیدیا گیا

اقوام متحدہ نے عراق کو ماحولیاتی تبدیلی سے متاثرہ پانچواں سب سے زیادہ کمزور ملک قرار دیا ہے، 2022 میں بھی عراق میں آنے والے شدید طوفان کے نتیجے میں ایک شخص ہلاک اور پانچ ہزار سے زائد افراد متاثر ہو گئے تھے۔