(بابر شہزاد تُرک) قومی ادارہ صحت نے کانگو بخار (سی-سی-ایچ-ایف) اور ہیٹ سٹروک سے متعلق ایڈوائزریز جاری کر دی ہیں،ایڈوائزریز صحت کے متعلقہ اداروں کو بیماریوں کی روک تھام کے حوالے سے بروقت اور مناسب اقدامات کرنے کیلئے جاری کی گئی ہیں۔
ایڈوائزری کے مطابق کانگو بخار ایک خاص قسم کے وائرس (نیرو وائرس) سے ہونے والی بیماری ہے جو کہ متعدد جانوروں، جیسے بکری، بھیڑ اور خرگوش وغیرہ کے بالوں میں چھپی ہوئی چیچڑیوں میں پایا جاتا ہے،یہ وائرس انسانوں میں یا تو چیچڑی کے کاٹنے سے یا جانور ذبح کرنے کے دوران اور اُس کے فوراً بعد متاثرہ جانوروں کے خون یا بافتوں کےذریعے منتقل ہوتا ہے، انسانوں میں اِس وائرس کی منتقلی متاثرہ چیچڑی یا جانوروں کے خون کے ذریعے ہوتی ہے، یہ وائرس متاثرہ شخص سے صحت مند شخص میں بھی منتقل ہو سکتا ہے، ایڈوائزریز کے مطابق 2024 میں پاکستان میں اس بیماری کے61 کیسز رپورٹ ہوئے ہیں۔
عیدالاضحٰی کے موقع پر ملک کے تمام صوبوں سے جانوروں کی نقل و حرکت غیر معمولی طور پر بڑھ جاتی ہے اور عام لوگوں کا جانوروں سے رابطہ اور قربت بھی بڑھ جاتی ہے، اس لئے کانگو بخار کے پھیلنے کا خدشہ ہوتا ہے، لہذا اس وائرس سے محفوظ رہنے کے لئے احتیاطی تدابیر اختیار کرنا بے حد ضروری ہے،ایڈوائزری میں شہریوں کو تلقین کی گئی ہے کہ وہ ہلکے رنگ کے کپڑے پہنیں تاکہ کپڑوں پر موجود چیچڑی کا آسانی سے پتہ چل سکے اگر جلد یا لباس پر چیچڑی موجود ہو تو اسے محفوظ طریقے سے ہٹا دیں، ایسے علاقوں میں جانے سے گریز کریں جہاں ٹِکس (چیچڑی) بکثرت ہوں۔
سن سٹروک ایڈوائزری کے مطابق حالیہ برسوں میں دنیا بھر کی طرح پاکستان کو گرمی کی لہر سمیت گلوبل وارمنگ کی وجہ سے شدید موسمیاتی تبدیلیوں کا سامنا ہے،ہر سال ملک میں گرمی کی لہر کے خطرات اور اثرات میں اضافہ ہو رہا ہے جس کے نتیجے میں ہیٹ سٹروک کی وجہ سے بیماری اور اموات میں اضافہ ہو سکتا ہے، ایڈوائزری میں اِس بات پر زور دیا گیا ہے کہ اس سلسلے میں فوری ضروری اقدامات اٹھانا مناسب ہے، براہِ راست سورج کی روشنی اورڈی ہائیڈریشن سے بچنا ہیٹ اسٹروک کی پیچیدگیوں کو روک سکتا ہے، مزید معلومات کے لئے یہ دونوں ایڈوائزری قومی ادارہ صحت کی ویب سائیٹ پر موجود ہے۔
یہ بھی پڑھیں؛ بناسپتی گھی اورخوردنی تیل کی پیداوارمیں کمی ریکارڈ