آکاش انصاری کے کیس میں اہم پیشرفت،بیٹااورڈرائیورشامل تفتیش

 (24نیوز)گھر میں آگ لگنے سے جھلس کر جاں بحق ہونےوالے سندھی کے نامور شاعر آکاش انصاری کے کیس میں اہم پیشرفت سامنے آگئی ۔

 پولیس کے مطابق آکاش انصاری کے لے پالک بیٹے لطیف آکاش نے کہا تھا کہ آگ لگنے کا واقعہ صبح ساڑھے 8 بجے کے قریب پیش آيا، کمرے کا دروازہ کھولا گیا توڈاکٹر آکاش بیڈ سے نیچے گرے ہوئے تھے، اندر کمرے میں جانےکی کوشش کی تو اس کے پاؤں جل گئے۔

پولیس کا کہنا ہے کہ آکاش انصاری نے اپنے لے پالک بیٹے کے خلاف گزشتہ برس مقدمہ بھی درج کرایا تھا لیکن بعد میں اس سے صلح ہوگئی تھی۔

یہ انکشاف بھی ہوا کہ آگ صرف آکاش انصاری کے کمرے میں ہی لگی تھی جبکہ پوسٹ مارٹم میں آکاش انصاری کے جسم پر تشدد کے نشانات بھی پائے گئے، جس کے لیے بظاہر تیز دھار آلہ استعمال کیا گیا۔

ایم ایل او کے مطابق ڈاکٹر آکاش انصاری کا جسم زیادہ جلا ہوا ہے جبکہ آکاش انصاری کے لے پالک بیٹے لطیف آکاش اور ڈرائیور کو حراست میں لے کر انہیں حیدرآباد منتقل کردیا گیا ہے۔

واضح رہے کہ آکاش انصاری کی  حیدرآباد کے علاقے قاسم آباد کی سیٹیزن کالونی میں گھر پر جھلس کر موت ہوئی تھی،  آکاش انصاری کو بدین میں نماز جنازہ کے بعد سپرد خاک کر دیا گیا۔
یہ بھی پڑھیں:کہیں بارش تو کہیں برفباری:محکمہ موسمیات نے خوشخبری سنادی

ڈاکٹرآکاش انصاری کے شعری مجموعوں میں ادھورا ادھورا اور کین رھاں جلا وطن شامل ہیں ، انہیں شیخ ایاز اور استاد بخاری کے بعد جدید سندھی شاعری میں سب سے زیادہ عوامی مقبولیت پانے والا شاعر بھی کہا جاتا ہے۔