(ملک رحمان)گورنر خیبر پختونخوا فیصل کریم کنڈی نے کہا ہے کہ پہلے بھی صوبائی حکومت افغانستان گئی تھی، 40 ہزار دہشت گرد لے کر آئے تھے، اب پتہ نہیں کہ جاکر کتنے لوگ لائیں گے؟
پشاور یونیورسٹی میں چترال کرکٹ ٹورنامنٹ کی تقریب سے خطاب کرتے ہوئےفیصل کریم کنڈی نے کہا کہ چترال کرکٹ ہنٹ پر منتظمین کو مبارکباد پیش کرتا ہوں، جو کام حکومت نہ کرسکی، وہ کام چترالیوں نے کر دکھایا، ہمارے کھیلوں کے میدان ویران ہیں۔
فیصل کریم کنڈی نے کہا ہے کہ صوبے میں امن کا قیام صوبائی حکومت کی ذمہ داری ہے، وزیر اعلیٰ کے اپنے ضلع کے حالات سب کے سامنے ہیں،سیاستدان پاکستان کا اثاثہ ہیں، آئی جی سے کہوں گا مولانا فضل الرحمان کو سیکیورٹی فراہم کریں۔
گورنر کے پی نے کہا کہ ہمارے صوبے میں گراؤنڈ نہ ہونے کی وجہ سے انٹرنیشنل سطح پر کھیلوں کا انعقاد ممکن نہیں رہا ، صوبائی حکومت کا منشور تھا کہ کھیلوں کے میدان بنائیں گے، خیبر پختونخوا حکومت اور وزیر کھیل بھی کھیلوں کے میدان آباد کرنے میں دلچسپی لیں۔
ان کا کہنا تھا کہ موجودہ حکومت کے ذمہ دار صرف ٹریک سوٹ پہن کر گھومتے ہیں، کھیلوں کے لئے بھی صوبائی حکومت کچھ کرکے دکھائے، ہمارے صوبے پر دہشت گردی اور انتہا پسندی کا لیبل لگا ہوا ہے، میں نے خواتین کو بااختیار بنانے اور نوجوانوں کو سہولیات دینے کا عزم کیا ہے۔
گورنر نے کہا کہ امن کا قیام صوبائی حکومت کی ذمہ داری ہے، وزیر اعلیٰ کے اپنے ضلع کے حالات سب کے سامنے ہیں، وزیراعلیٰ کا شکریہ ادا کرتا ہوں کہ انھوں میری آل پارٹیز کانفرنس کو دیکھتے ہوئے اسلام آباد میں منی کانفرنس کی،فیصل کریم کنڈی کا کہنا تھا کہ صرف کرم کے مسئلے پر نہیں پورے صوبے کی امن وامان پر توجہ دیں، وزیراعلیٰ ہاؤس مشکل وقت سے گزررہا ہے، بحثیت ہمسایہ میری ہمدردی ان کے ساتھ ہے۔
انہوں نے مزید کہا کہ آہستہ آہستہ وزیر اعلیٰ ہم سے سیاست سیکھ رہے ہیں، یہ لوگ 25 کلومیٹر سڑک کو محفوظ نہیں کر سکتے ہیں، پہلے بھی کہا تھا کہ افغانستان کی سرزمین ہمارے خلاف استعمال ہوتی ہے، لیکن پی ٹی آئی والے نہیں مان رہے تھے،سیاست ہوتی رہے گی، امن وامان پر سمجھوتہ نہیں ہوگا، رمضان کے بعد سیاست میں تیزی آئے گی۔
یہ بھی پڑھیں؛ وزیرخارجہ اسحاق ڈار 18 فروری کو امریکا روانہ ہوں گے