عمان : مجلس کے دوران دہشتگردوں کا حملہ، 5 افراد جاں بحق،15 زخمی
![عمان : مجلس کے دوران دہشتگردوں کا حملہ، 5 افراد جاں بحق،15 زخمی](https://www.24urdu.com/digital_images/large/2024-07-16/news-1721107664-8927.jpg)
Stay tuned with 24 News HD Android App
![Get it on Google Play](https://play.google.com/intl/en_us/badges/static/images/badges/en_badge_web_generic.png)
(ویب ڈیسک)عمان کے علاقے وادی الکبیر کی امام علی مسجد میں مجلس کے دوران دہشتگردوں نے حملہ کر دیا جس کےنتیجے میں 5 افراد جاں بحق اور 15 زخمی ہوگئے۔
غیر ملکی میڈیا کے مطابق عمان کے دارالحکومت مسقط میں وادی الکبیر کی امام علی مسجد میں نامعلوم افراد کی جانب سے فائرنگ کی گئی،دہشتگردوں کے حملے کے دوران مسجد میں مجلس عزا جاری تھی، جس میں 700 سے زائد افراد موجود تھے، فائرنگ کے نتیجے میں 5 افراد جاں بحق اور 15 سے زائد زخمی ہوگئے، جن میں زیادہ تر پاکستانی شامل ہیں۔
رائل عمان پولیس نے بتایا کہ وادی الکبیر کے علاقے میں ایک مسجد پر فائرنگ کی اطلاعات ملی ہیں جس میں ابتدائی طور پر 5 افراد کے جاں بحق اور درجنوں زخمی ہونے کی اطلاعات موصول ہوئی ہیں۔
پولیس کی جانب سے جاری بیان میں کہا گیا کہ صورتحال سے نمٹنے کے لیے تمام ضروری حفاظتی اقدامات اور طریقہ کار اختیار کئے گئے ہیں، جب کہ واقعے کی تحقیقات کی جارہی ہیں اور شواہد اکھٹے کیے جارہے ہیں۔
خیال رہے کہ علاقائی تنازعات میں باقاعدگی سے ثالث کا کردار ادا کرنے والی سلطنت عمان میں اس طرح کے حملے شاذ و نادر ہی ہوتے ہیں،مسقط میں امریکی سفارت خانے نے فائرنگ کے واقعے کے بعد سکیورٹی الرٹ جاری کیا اور منگل کو تمام ویزا اپائنٹمنٹس منسوخ کر دیئے ہیں۔
سفارتخانے نے سوشل میڈیا پلیٹ فارم ’ایکس‘ پر لکھا امریکی شہریوں کو چوکنا رہنا چاہیے اور مقامی حکام کی ہدایات پر مکمل عمل کرنا چاہیے۔