امریکی صدر کے حکم پر یمن میں حوثیوں کے ٹھکانوں پر حملے،24 افراد ہلاک

(24 نیوز )امریکی صدر ڈونلڈ ٹرمپ کے حکم پر یمن میں حوثیوں کے ٹھکانوں پر بڑے پیمانے پر فوجی حملے،24 افراد ہلاک جبکہ متعددزخمی ہو گئے ۔

امریکی میڈیا رپورٹس کے مطابق ان حملوں میں حوثیوں کے ریڈار سسٹمز، فضائی دفاعی میزائل تنصیبات، اور ڈرونز کی تنصیبات کو نشانہ بنایا گیا۔

 حملوں میں 24 افراد جاں بحق جبکہ متعدد زخمی ہو گئے۔

امریکی حکام کے مطابق ان کارروائیوں کا بنیادی مقصد بحیرہ احمر میں بین الاقوامی جہاز رانی کی راہوں کو محفوظ بنانا اور حوثیوں کی جانب سے جاری حملوں کا سلسلہ روکنا ہے۔

 یہ بھی پڑھیں:امریکہ میں طوفان نے تباہی مچا دی،19 افراد ہلاک

امریکی صدر ڈونلڈ ٹرمپ نے ان حملوں پر اپنے ردعمل میں کہا کہ میں نے یمن میں حوثیوں کے خلاف فیصلہ کن حملوں کا حکم دیا ہے، حوثیوں نے امریکی اور دیگر ممالک کے جہازوں پر حملے کیے جو ناقابلِ برداشت ہے، سابق صدر جو بائیڈن نے حوثیوں کے خلاف کمزور اور ناکافی کارروائیاں کیں جس کی وجہ سے وہ بے لگام ہوگئے۔

ٹرمپ نے کہا کہ ایران کی مالی اور عسکری امداد کی بدولت حوثیوں نے امریکی جہازوں کو نشانہ بنایا، اب ان حملوں کو برداشت نہیں کیا جائے گا اور ہم اپنے مقاصد کے حصول تک طاقت کا استعمال جاری رکھیں گے، حوثیوں کے لیے وقت ختم ہوچکا ہے، انہیں فوری طور پر امریکی جہازوں پر حملے بند کر دینے چاہئیں۔