انڈونیشیا کے نائب وزیر برائے کثیرالجہتی تعاون کا،کامسٹیک سیکرٹریٹ اسلام آباد کا دورہ

 (24 نیوز)انڈونیشیا کے نائب وزیر برائے کثیرالجہتی تعاون تری تھاریات کا کامسٹیک سیکرٹریٹ اسلام آباد کا دورہ، مقصد کامسٹیک اور انڈونشیاء کے مابین سائنس ٹیکنالوجی، اعلی تعلیم کے لیے فیلوشپس سمیت مستقبل کے منصوبوں پر تبادلہ خیال کرنا تھا۔

انڈونیشیا کی وزارتِ خارجہ کے نائب وزیر برائے کثیرالجہتی تعاون تری تھاریات نے جمعرات کے روز کامسٹیک سیکرٹریٹ اسلام آباد کا دورہ کیا، نائب وزیر کے ہمراہ انڈونشیاء کے پاکستان میں قائم مقام سفیر سمیت سفارتخانہ کے حکام بھی شامل تھے۔

وفد کے ساتھ ہونے والی ملاقات میں کامسٹیک کے کو آرڈینیٹر جنرل پروفیسر ڈاکٹر محمد اقبال چوہدری نے کہا کہ انڈونیشیاء اسلامی تعاون تنظیم اور کامسٹیک کے بانی ممالک میں سے ایک ہے جو مسلم دنیا میں سائنس و ٹیکنالوجی کے فروغ میں کلیدی کردار ادا کر رہا ہے۔

ملاقات میں باہمی تعاون کو مختلف اہم شعبوں میں وسعت دینے پر تبادلہ خیال ہوا۔ کوآرڈینیٹر جنرل کامسٹیک نے شعبہ صحت میں تعاون، انڈونیشیا میں او آئی سی سینٹر آف ایکسی لینس، نیشنل میڈیکل ریگولیٹری اتھارٹی کے قیام کی تجویز دی۔انہوں نے انڈونیشیا میں او آئی سی ٹیکنو فیسٹیول کے انعقاد کی تجویز بھی دی تاکہ رکن ممالک کے درمیان ٹیکنالوجی کے تبادلے اور جدت کو فروغ دیا جا سکے۔

ملاقات میں کامسٹیک انڈونیشیا وائرولوجی پروگرام کے تسلسل اور توسیع، انڈونیشیا کی اعلیٰ تعلیمی ادارے (ایچ۔ ای۔ آئیز)، تحقیق و ترقی (آر۔ اینڈ۔ ڈی) کے ادارے، اور صنعت کو کامسٹیک کے کلیدی پروگرامز جیسے ریسرچ فیلوشپس، ٹیکنیشن ٹریننگ پروگرامز، اور فلسطینی اسکالرشپ پروگرام میں شامل کرنے پر بھی تبادلہ خیال کیا گیا۔

سفیر ایچ۔ ای۔ تری تھاریات نے سائنس، ٹیکنالوجی، صحت، اور اعلیٰ تعلیم کے میدان میں کامسٹیک کی جاری خدمات کو سراہا۔ انہوں نے کامسٹیک کنسورشیم آف ایکسی لینس (سی سی او ای) میں انڈونیشیا کے کردار کو مزید مضبوط بنانے کے عزم کا اعادہ کیا اور تنظیم تعاون اسلامی کے رکن ممالک کی سماجی و اقتصادی ترقی میں مسلسل کردار ادا کرنے پر زور دیا۔ انہوں نے مزید انڈونیشی جامعات اور تحقیقاتی اداروں کو کامسٹیک پروگرامز میں شامل کرنے کی خواہش کا بھی اظہار کیا۔ملاقات میں کامسٹیک اور پاکستان میں انڈونشیاء کے سفارتخانہ کے اعلیٰ حکام بھی شریک تھے۔

یہ دورہ کامسٹیک اور انڈونیشیا کے درمیان سائنسی و تکنیکی تعاون کو فروغ دینے کی جانب ایک اہم قدم تھا، جو او آئی سی خطے میں مشترکہ مؤثر اقدامات کے لیے راہ ہموار کرے گا۔