’’شکر ہے شاہین کا سامنا نہیں کرنا پڑے گا‘‘، غیر ملکی بلے باز نے دل کی بات کہہ دی

( ویب ڈیسک )لاہور قلندرز میں شامل ویسٹ انڈین کرکٹر ’’شائے ہوپ ‘‘ کا کہنا ہے کہ شکر ہے پی ایس ایل میں  شاہین  کا سامنا نہیں کرنا پڑے گا۔

تفصیلات کے مطابق ویسٹ انڈین بلے باز کا کہنا تھا کہ پہلی بار ایسا ہو رہا ہے کہ شاہین گیند بازی کر رہا ہو اور میں وکٹوں کے سامنے نہیں بلکہ وکٹوں کے پیچھے ہوں گا اس بات کی مجھے بہت خوشی ہے ،غیر ملکی کھلاڑی کا مزید کہنا تھا کہ شاہین اور حارث جیسے پلیئرز کے ساتھ ڈریسنگ روم شیئر کرنے پر خوش ہوں۔

شائے ہوپ کا کہنا تھا کہ شاہین اور حارث دونوں شاندار بولر ہیں، ان کے ساتھ کھیل کر مزہ آرہا ہے، دنیا کے بہترین ٹی ٹونٹی پلیئرز سے سیکھنے کا موقع بھی ملے گا، کوشش ہے کہ میں خود کو پہلے سے بہتر کرکٹر بناﺅں۔شائے ہوپ نے کہا کہ لاہور قلندرز کا آغاز اچھا ہوا، پہلے میچ میں فاتح ٹیم کا حصہ بننے پر خوش ہوں ، انہوں نے کہا کہ جس سے بھی بات ہوئی اس نے پاکستان سپر لیگ کی تعریف کی، پاکستان نے اپنی لیگ کا معیار کافی بلند رکھا ہے۔شائے ہوپ نے کہا کہ وقت آگیا ہے کہ ویسٹ انڈیز کے کرکٹرز ٹیم کی بہتری کے لیے ذمہ داری لیں۔انہوں نے کہا کہ بطور کپتان کوشش ہوگی کہ ساتھیوں سے اپنا تجربہ شیئر کروں، ویسٹ انڈیز ٹیم کو پہلے کی طرح ایک مضبوط ٹیم بنانا ہے۔