پانڈیا کی اہلیہ نے بیٹے کے ہمراہ بھارت کو الوداع کہہ دیا

(24نیوز) بھارتی آل راؤنڈر ہاردک پانڈیا سے طلاق کی خبروں کے درمیان ان کی اہلیہ اور سربیئن اداکارہ  نتاشا سٹینکوویچ نے بھارت کو الوداع کہہ دیا۔ 

 بھارتی میڈیا کے مطابق گزشتہ روز سربیئن ماڈل و اداکارہ نتاشا  سٹینکوویچ اپنے بیٹے کے ہمراہ ممبئی ائیرپورٹ پر  نظر آئیں،اس سے پہلے نتاشا نے انسٹاگرام سٹوری پر اپنا سامان پیک کرتے ہوئے ایک تصویرپوسٹ کی تھی جس کے کیپشن سے مداحوں نے اندازہ لگایا کہ نتاشا اپنے بیٹے کے ہمراہ آبائی ملک سربیا جارہی ہیں، بھارتی میڈیا نے بھی دعویٰ کیا ہے کہ نتاشا بیٹے کے ساتھ آبائی ملک سربیا روانہ ہوگئی ہیں۔

خیال رہے کہ ہاردک پانڈیا اورسربیئن اداکارہ و ماڈل نتاشا سٹینکوویچ مئی 2020 میں شادی کے بندھن میں بندھے تھے تاہم رواں سال مئی میں اس وقت ان کی علیحدگی کی خبریں گردش کرنے لگی تھیں جب نتاشا نے اپنے انسٹاگرام اکاؤنٹ پر نام کے ساتھ ’پانڈیا‘ ہٹا دیا تھا۔

آئی پی ایل 2024 کے میچز میں نتاشا کی عدم شرکت سے بھی دونوں کے درمیان علیحدگی کی افواہوں کو تقویت ملی تھی، ٹی20 ورلڈ کپ سے واپسی کے بعد پانڈیا بھی اپنی اہلیہ کے ساتھ نظر نہیں آئے تھے۔

 اس دوران ہاردک پانڈیا اور ان کی اہلیہ نتاشا سٹینکوویچ کی علیحدگی کی افواہوں پر ان کے ایک قریبی دوست کا بیان سامنے آیا تھا۔

بھارتی میڈیا کے مطابق ہاردک اور نتاشا کے دوست کا کہنا تھا کہ دونوں کے تعلقات میں خرابی کی وجہ ہاردک بنے تاہم نتاشا بھی تعلقات کو معمول پر لانے کے لیے تیار دکھائی نہیں دیتیں۔

یہ بھی پڑھیں: ’’ تکلیف میں ہوں ‘‘ کیموتھراپی کے بعد کام شروع کرنے پر تنقید،حنا خان کا ردعمل