(مانیٹرنگ ڈیسک)وسیم بادامی نے ایک دلچسپ واقعہ سناتے ہوئے بتایا کہ میں جہاز میں سوار تھا جو تقریباً اڑان بھرنے کیلئے تیار تھا، اتنے میں ایک صاحب میرے پاس آئے اور کافی اونچی آواز میں کہا کہ مجھے آپ کا آٹوگراف چاہیے۔
تفصیلات کے مطابق معروف صحافی اور میزبان وسیم بادامی نے ایک یادگار قصہ مداحوں کے ساتھ شیئر کیا ،حال ہی میں وسیم بادامی نے نجی ٹی وی کے پروگرام میں شرکت کی اور بتایا کہ کس طرح ایک مداح نے انہیں گلوکار عاطف اسلم سمجھ کر آٹو گراف مانگا تھا۔
وسیم بادامی نے کہا کہ مجھے کافی تعجب ہوا کہ آج کل سیلفی کے دور میں لوگ آٹوگراف مانگ رہے ہیں، میں نے جیسے ہی آٹوگراف لکھنا شروع کیا تو کان میں آواز آئی کہ سر وہ جو آپ نے تاجدارِ حرم گایا وہ کمال تھا۔ میزبان کا کہنا تھا کہ یہ سنتے ہی مجھے سمجھ نہیں آیا کہ سر کیسے اٹھاؤں کیونکہ وہاں موجود تمام مسافر یہ سن رہے تھے۔
یاد رہے کوک اسٹوڈیو کے آٹھویں سیزن میں گلوکار عاطف اسلم نے اپنی سحر انگیز آواز میں تاجدارِ حرم پیش کیا تھا جسے عالمی سطح پر پذیرائی ملی تھی۔
یہ بھی پڑھیں: جعلی ڈاکٹر رنگے ہاتھوں گرفتار، انٹرن شپ کی مد میں پیسے بٹور رہا تھا