بھارتی ٹیم کو آسٹریلیا کیخلاف سیریز سے قبل بڑا جھٹکا لگ گیا

(ویب ڈیسک)بارڈ گواسکر ٹرافی سے قبل بھارتی ٹیم کی مشکلات کم ہونے میں نہیں آرہی ہیں، بلیو شرٹس کو سیریز سے قبل ایک اور بڑا جھٹکا مل گیا۔

آسٹریلیا کے خلاف بھارت کو بارڈر گواسکر ٹرافی کے سلسلے میں 22 نومبر سے برسرپیکار ہونا ہے، تاہم رپورٹس کے مطابق کپتان روہت شرما کے بعد اب بھارتی کرکٹ ٹیم کے سٹار بلے باز شبمن گل بھی پہلے ٹیسٹ میچ سے باہر ہو سکتے ہیں۔شبمن گل کو انجری کا سامنا ہے جس کے باعث وہ پہلے ٹیسٹ میں شاید میدان میں نہ اترسکیں، آسٹریلیا کے خلاف پہلے ٹیسٹ میچ میں ان کی شرکت مشکوک ہے جبکہ بی سی سی آئی نے بھی اس معاملے کو واضح نہیں کیا۔

یہ بھی پڑھیں:سابق کرکٹر کو قومی وائٹ بال کرکٹ ٹیم کا ہیڈ کوچ مقرر کر دیا گیا

سیریز کا پہلا میچ 22 سے 26 نومبر تک پرتھ میں ہونا ہے، شبمن گل کی انگلی زخمی ہوگئی ہے، ان کی انجری کا جائزہ لینے کے بعد پرتھ ٹیسٹ میں ان کے کھیلنے کے بارے میں جلد ہی حتمی فیصلہ کیا جائے گا۔

اس سے قبل شبمن گل نے نیوزی لینڈ کے خلاف سیریز میں دوسرے بھارتی بیٹرز کے مقابلے میں قدرے بہتر کارکردگی کا مظاہرہ کیا تھا جہاں میزبان کو پہلی بار اپنی سرزمین پر وائٹ واش کی ہزیمت سے دوچار ہونا پڑا تھا۔اس وقت ٹیسٹ میچز میں شبمن گل تیسرے نمبر پر بیٹنگ کرتے ہیں جو کہ کافی اہم سپاٹ خیال کیا جاتا ہے۔ گل نے نیوزی لینڈ کے خلاف سیریز میں 2 میچوں کی 4 اننگز میں 144 رنز بنائے تھے جبکہ 90 رنز ان کا سب سے بڑا سکور تھا۔

بھارتی ٹیم بارڈر گواسکر ٹرافی سے قبل انجری کے مسائل کا شکار ہے، بلے باز سرفراز خان بھی زخمی ہیں جبکہ تجربہ کار بلے باز کے ایل راہول بھی پریکٹس میچ کے دوران زخمی ہو گئے تھے۔

یہ بھی پڑھیں:پی سی بی نے کوچ جیسن گلیسپی کے حوالے سے بڑا فیصلہ کر لیا