پی ڈی ایم ان حکمرانوں کا خاتمہ کرکے دم لے گی۔۔ مولانا فضل الرحمان کا جلسہ سے خطاب

(24نیوز )فیصل آباد میں جلسے سے خطاب میں پی ڈی ایم کے سربراہ  مولانا فضل الرحمان نے وزیراعظم عمران خان کا نام لیے بغیر تنقید کی اور کہا کہ اب پی ڈی ایم نے تمہارا احتساب کرنا ہے، ہم نے ڈکٹیٹروں اور ان کے چیلوں کو چیلنج کیا ہے، عوام کا گناہ کیا ہے کہ تم نے آج عوام پر ظلم کے پہاڑ توڑدیے؟

تفصیلات کے مطابق اپنے خطاب میں فضل الرحما ن کا کہنا تھا کہ  تم نے سب کو چور کہا لیکن خود تحفے کی گھڑیاں بیچ دیں۔ان کا کہنا تھاکہ ایک کروڑ نوکریوں کی بات کی تھی جو حماقت سے کم نہیں، یہ ایک کروڑ نوکریاں کیا دیں گے، 30 لاکھ ملازمین کو فارغ کیا۔انہوں نے کہا کہ ریاستوں کی بقا کا دارومدار آج معیشت پر ہے، ایک بار پھر دنیا میں معیشت کی جنگ شروع ہوچکی ہے، آج کا حکمران یہ ایجنڈا لے کر آیا ہے کہ مغرب کی بالادستی قائم رہے۔

ان کا کہنا تھاکہ پارلیمنٹ عوام کی نمائندہ ہے، آج غیر مستحکم بنادیا گیا، جب لوگ خودکشی پر مجبور ہوجائیں گے تو پارلیمنٹ کی حیثیت کیا رہ رجائے گی؟فضل الرحمان کا کہنا تھاکہ عوام کو منظم ہوکر میدان میں نکلنا ہے اور پی ڈی ایم ان حکمرانوں کا خاتمہ کرکے دم لے گی، پنجاب بڑا صوبہ ہے، یہ اٹھے گا تو تمام ملک کا حوصلہ بڑھے گا، 31 اکتوبر کو ڈیرہ غازی خان میں پی ڈی ایم کا قافلہ پہنچے گا۔

یہ بھی پڑھیں:خدا کی قدرت۔۔خاتون کے ہاں بیک وقت 7 بچوں کی پیدائش