گلوکارہ ماہا علی کاظمی کا گلوکار علی نور پر جنسی ہراسانی کا الزام

(ویب ڈیسک ) گلوکارہ ماہا علی کاظمی نے نوری بینڈ کے معروف گلوکار علی نور پر جنسی ہراسانی کا الزام عائد کر دیا۔

فوٹو اینڈ ویڈیو شیئرنگ پلیٹ فارم  انسٹاگرام پر گلوکارہ ماہا علی کاظمی نے  اپنی انسٹا سٹوری پر ویڈیو پوسٹ کرتے ہوئے علی نور پر الزام عائد کیا ہے کہ گلوکار نے ان کو کوک اسٹوڈیو میں آڈیشن کے دوران ہراساں کیا۔گلوکارہ نے ویڈیو پیغام میں بتایا کہ" جب وہ کوک سٹوڈیو کے آڈیشن کیلئے گئیں تو علی نور نے ان سے نازیبا سوالات کئے اور انہیں ہراساں کرنے کی کوشش کی جبکہ انہیں آڈیشن کیلئے گانے بھی نہیں دیا اور یہ احساس دلانے کی کوشش کی کہ وہ بہتر گلوکارہ نہیں ہیں"۔

View this post on Instagram

A post shared by Galaxy Lollywood (@galaxylollywood)

ماہا علی کاظمی نے علی نور پر انہیں زبردستی نشہ کروانے کی کوشش کرنے کا بھی الزام عائد کیا ہے ویڈیو پیغام میں ماہا کا کہنا تھا کہ" وہ چاہے مشہور گلوکارہ نہیں مگر ایسی خاتون بھی نہیں جو مشہور ہونے کیلئے کسی کی گندی آفر قبول کرلیں"۔ماہا علی کاظمی نے علی نور کو انتہائی گندی سوچ کا مالک اور خواتین کو ہراسانی کا نشانہ بنانے والا شخص قرار دیا ہے۔

یاد رہے کہ اس سے قبل ایک صحافی عائشہ بنت راشد نے بھی علی نور پر جنسی ہراسانی کے الزامات عائد کئے تھے تاہم بعد میں علی نور نے خاتون صحافی سے معافی مانگ لی تھی۔