مختلف شہروں میں طوفانی بارش اور ژالہ باری کی پیشگوئی

(24نیوز)ملک کے مختلف شہروں میں آج اور کل طوفانی بارش اور بعض مقامات میں ژالہ باری کا امکان ہے,لاہور میں تیز آندھی  کیساتھ  مختلف علاقوں میں ہلکی بارش سے موسم خوشگوار ہو گیا۔

اسلام آباد، راولپنڈی سمیت پنجاب کے مختلف علاقوں میں شدید موسمی صورتحال کی وارننگ جاری کر دی گئی، نیشنل ایمرجنسی آپریشن سینٹر نے الرٹ جاری کر دیا  ، نیشنل ڈیزاسٹر مینجمنٹ اتھارٹی (این ڈی ایم اے) کے مطابق فیصل آباد، حافظ آباد، جھنگ، خوشاب اور میانوالی بھی شدید موسم کی زد پر آ سکتے ہیں جبکہ لاہور، نارووال، ساہیوال، سرگودھا اور شیخوپورہ کیلئے بھی موسم کا الرٹ جاری کیا گیا ہے۔

دوسری جانب 48 گھنٹے میں خیبر پختونخوا کے مختلف علاقوں میں بارش وبرفباری کا امکان ہے جس سے پہاڑی علاقوں میں لینڈ سلائیڈنگ اوربرفانی تودے گرنے کا خدشہ ہے، مالاکنڈ، ہزارہ، بنوں، چارسدہ، کرک، سمیت کئی اضلاع متاثر ہو سکتے ہیں، جبکہ پشاور، مردان، نوشہرہ، سوات اور گردونوح میں بھی بارش کا امکان ہے جس کے باعث سیلابی صورتحال پیدا ہو سکتی ہے۔

این ڈی ایم اے کی جانب سے کہا گیا ہے کہ شہری غیر ضروری سفر سے گریز کریں اور موسمی حالات سے آگاہ رہنے کیلئے موبائل ایپ این ڈی ایم اے ڈیزاسٹر الرٹ کو فالو کریں۔ 

اس کے علاوہ وادی کوئٹہ اور گرد و نواح میں مطلع صاف اور موسم خشک و معتدل ہے،محکمہ موسمیات کے مطابق بلوچستان کے جنوبی علاقوں میں گرمی کی شدت بر قرار ہے۔

ژوب، موسیٰ خیل، بارکھان اور گرد و نواح میں آج آندھی چلنے اور گرج چمک کے ساتھ بارش اور ژالہ باری کا امکان ہے،جنوبی اضلاع میں درجہ حرارت میں 3 سے 5 ڈگری سینٹی گریڈ اضافے کی پیش گوئی کی گئی ہے جس سے گرمی کی شدت میں اضافہ ہو گا۔