امریکا کسی کا وفادار نہیں،حکمران غزہ پر ظلم پر مذمت کریں، حافظ نعیم

(24نیوز)امیر جماعت اسلامی حافظ نعیم الرحمان نے کہا ہے کہ امریکا سے محبت کرنے والے حکمرانوں کو کہتا ہوں وہ کسی کا وفادار نہیں، حکمران امریکا، اسرائیلی مظالم کی مذمت کریں۔ 
غزہ مارچ سے خطاب کرتے ہوئے امیر جماعت اسلامی حافظ نعیم الرحمان نے کہا کہ فلسطینی ڈٹ کر کھڑے ہیں، اسرائیل نے پورے غزہ کو ملبے کا ڈھیر بنا دیا ہے، دہشت گرد امریکا اسرائیل کی پشت پناہی کر رہا ہے، اسرائیل، امریکا فلسطینیوں کی نسل کشی کر رہے ہیں۔

حافظ نعیم الرحمان نے کہا کہ مسلم حکمرانوں نے غیرت کی چادر اتار دی ہے، اسی وجہ سے بزدل دشمن اسرائیل مضبوط بن گیا ہے، حماس امت مسلمہ کے ماتھے کا جھومر ہے، اسرائیل نہتے فلسطینیوں پر ظلم کر رہا ہے۔

امیرجماعت اسلامی نے کہا کہ حکمران اسرائیل کے بجائے جہاد کا فتویٰ دینے والوں پر تنقید کرتے ہیں، ایسے لوگ سوشل میڈیا پر اسرائیل کو سپورٹ کر رہے ہیں، حکمران اور اپوزیشن والے انجمن غلامان بنے ہوئے ہیں، ہمیں اسرائیلی مصنوعات کے بائیکاٹ کی مہم کو آگے بڑھانا ہے۔

حافظ نعیم الرحمان نے کہا کہ ہماری بدقسمتی ہے کہ امریکا کے غلام ہم پر مسلط ہیں، اسلام آباد میں سب سے بڑا غزہ مارچ ہوگا، وزیراعظم بتائیں کونسی اسرائیل کی قرارداد کو نرم کیا گیا ہے، اسرائیل ناجائز اس کی کسی بھی شکل کو تسلیم نہیں کریں گے۔

انہوں نے کہا کہ آرمی چیف نے گزشتہ دنوں غزہ کے لوگوں سے اظہار یکجہتی کیا، وزیراعظم، آرمی چیف مسلم ممالک سربراہان کا اجلاس بلائیں، پوری دنیا میں وفود بھیجے جائیں، اسرائیل کا ہدف گریٹر اسرائیل ہے، کوئی بھی نہیں بچے گا۔

امیر جماعت اسلامی کا کہنا تھا کہ فلسطین ہمارا ایمان اور دل ہے، کمپرؤمائز نہیں کر سکتے، 26 اپریل کو ملک گیر شٹرڈاؤن ہڑتال ہوگی، تاجروں سے مشاورت کے بعد اب ملک گیر ہڑتال 22 کے بجائے 26 اپریل کو ہوگی، 26 اپریل کو پورا پاکستان بند ہوگا۔حافط نعیم الرحمان نے کہا کہ 26 اپریل کو آئندہ کے لائحہ عمل کا اعلان کریں گے، 26 اپریل کو تاریخی ہڑتال ہوگی۔