سٹاک مارکیٹ تیزی کے بعد لڑکھڑاگئی، انڈیکس میں 3 ہزار پوائنٹس کمی

 (24نیوز)سٹاک مارکیٹ شرح سود میں کمی کے 2 روز بعد لڑکھڑاگئی،انڈیکس میں 3 ہزار پوائنٹس کمی،ڈالر کی قیمت میں معمولی کمی ریکارڈ کی گئی۔

پاکستان سٹاک ایکسچینج میں شدید مندی کا رجحان ہے،کاروباری ہفتے کے تیسرے روز سٹاک ایکسچینج میں کاروبار کا آغاز مثبت زون میں ہوا،  100 انڈیکس میں 1261 پوائنٹس کا اضافہ ہوا تاہم تیسرے سیشن میں مارکیٹ ایک لاکھ 15 ، 14 ، 13 اور 12 ہزارپوائنٹس کی 4 حدیں گنوابیٹھی۔
بدھ کی سہ پہر 2 بج کر 34 منٹ پر بینچ مارک کے ایس ای 100 انڈیکس 3 ہزار 101 پوائنٹس یا 2.78 فیصد کی کمی سے ایک لاکھ 11 ہزار 759 پوائنٹس کی سطح پر آگیا۔

 ایک موقع پرمارکیٹ میں1376پوائنٹس کی تیزی بھی دیکھی گئی تھی۔

بروکرز کے مطابق بینکنگ ،فرٹیلائزر اور آئل سیکٹرز کے شیئرزمیں فروخت کا دبائو بڑھ گیا، میوچل فنڈز کے شیئرز بیچنے کی خبروں پرمارکیٹ تنزلی کاشکارہوئی۔

دوسری جانب انٹر بینک میں کاروبار کے آغاز میں امریکی ڈالر کے بھاؤ میں 2 پیسے کی کمی ہوئی۔ جس کے بعد ڈالر 278 روپے 25 پیسے کا ہو گیا۔ گزشتہ روز کاروبار کے اختتام پر انٹر بینک میں ڈالر کا ریٹ 278 روپے 27 پیسے پر بند ہوا تھا۔