(24 نیوز)رات دیر تک جاگنے والے افراد دن بھر سستی کا شکار رہنے کے ساتھ چیلنجز کا مقابلہ کرنے میں بہت پیچھے رہ جاتے ہیں۔
حالیہ تحقیق میں یہ بات سامنے آئی ہے کہ رات کو جلدی سونے اور صبح جلد اٹھنے والے افراد چیلنجز کا سامنا آسانی سے کر لیتے ہیں، یہ بات ایک نئی طبی تحقیق میں سامنے آئی۔
برٹش میڈیکل جرنل مینٹل ہیلتھ کی تحقیق میں یہ دلچسپ انکشاف کیا گیا کہ صبح جلد جانے والے افراد کے اندر اپنی ذاتی اہمیت کا احساس زیادہ ہوتا ہے۔
تحقیق میں بتایا گیا کہ ایسے افراد کی ذہنی صحت اور شخصیت رات گئے تک جاگنے والوں کے مقابلے میں بہت زیادہ بہتر ہوتی ہے۔
لندن کالج یونیورسٹی کی اس تحقیق میں 49 ہزار سے زائد افراد سے 2 برسوں کے دوران ہونے والے درجنوں سرویز کے ڈیٹا کی جانچ پڑتال کی گئی۔
یہ سرویز مارچ 2020 سے مارچ 2022 کے دوران ہوئے تھے اور تحقیق میں دیکھا گیا کہ سونے جاگنے کے اوقات اور ذہنی صحت کے درمیان کیا تعلق موجود ہے۔
تحقیق میں دریافت کیا گیا کہ اگر صبح جلد جاگنے کے معمول کا تسلسل برقرار رکھا جائے تو اس سے پورے دن مثبت جذبات کو برقرار رکھنے میں ممکنہ مد ملتی ہے۔
جو افراد جلد جاگنے کے عادی ہوتے ہیں، ان کی جانب سے زندگی پر زیادہ اطمینان ظاہر کیا جاتا ہے، وہ زندگی میں زیادہ خوشی محسوس کرتے ہیں جبکہ ڈپریشن کے شکار ہونے پر علامات کی شدت زیادہ سنگین نہیں ہوتی۔اس کے ساتھ ساتھ صبح جاگنے پر انہیں اپنی ذاتی اہمیت کا بہت زیادہ احساس ہوتا ہے۔
تحقیق کے مطابق اس کے مقابلے میں رات گئے تک جاگنے والے افراد کی ذہنی صحت متاثر ہونے کا خطرہ زیادہ ہوتا ہے جبکہ ان کا مزاج بھی اکثر چڑچڑا رہتا ہے۔
جیسے صبح جلد جاگنے پر سورج کی روشنی میں زیادہ وقت تک گھومنے کا موقع ملتا ہے، نیند کا معیار بہتر ہوتا ہے جبکہ عزم بھی بڑھتا ہے۔تحقیق کے مطابق رات گئے تک جاگنے والے افراد میں چربی زیادہ آسانی سے جمع ہوجاتی ہے۔