الیکشن کمیشن کا ایکشن ،گوشوارے جمع نہ کرانے پر154 ارکان اسمبلی کی رکنیت معطل

(24نیوز)مالی گوشوارے جمع نہ کرانے کی پاداش میں الیکشن کمیشن نے 154 اراکین اسمبلی کی رکنیت معطل کر دی ۔  ان میں وفاقی وزرا فواد چودھری، علی زیدی، خالد مقبول صدیقی، ڈاکٹرعامر لیاقت حسین اور فہمیدہ مرزا بھی شامل ہیں جبکہ 3 سینیٹرز مصدق ملک، کامران مائیکل اور شمیم آفریدی کی رکنیت بھی معطل کردی گئی ۔

الیکشن کمیشن کے مطابق قومی اسمبلی کے 48،کے پی اسمبلی کے 26 ارکان کی رکنیت معطل کی گئی  جبکہ بلوچستان اسمبلی کے 6 ارکان کی رکنیت معطل کی ہے اور ان میں سردار یار محمد رند اور اختر لانگو بھی شامل ہیں۔الیکشن کمیشن نے  فیصلے سے سنیٹ، قومی و صوبائی اسمبلیوں کے سپیکرز کو آگاہ کرتے ہوئے کہا ہے کہ معطل ارکان ایوان کی کارروائی میں حصہ نہیں لے سکتے اور گوشوارے جمع کروانے تک رکنیت معطل رہے گی۔