پا بندیا ں ختم ،مصر ، امارات کی قطر کے سا تھ پروازوں کا آغاز

(24نیوز) مصر اور امارات کے بھی قطر کے ساتھ فضائی رابطے بحال، 2017 کے بعد پہلی مرتبہ براہ راست پروازوں کا آغاز ہوگیا۔
تفصیلا ت کے مطا بق  متحدہ عرب امارات اور مصر نے علاقائی بحران کے خاتمے  پر2017 کے بعد قطر کے ساتھ فضائی رابطے بحال کردیئے۔ پیر کو پہلی مرتبہ براہ راست پروازوں کا آغاز  کر دیا گیا۔ مصر اور متحدہ عرب امارات نے جون 2017 میں سعودی عرب اور بحرین کا ساتھ دیتے ہوئے قطر کے ساتھ تعلقات منقطع کرلیے تھے اور یہ الزام لگایا تھا کہ وہ ایران کے بہت قریب ہے اور اسلامی شدت پسندوں کی پشت پناہی کر رہا ہے۔ دوحہ نے اس الزام سے انکار کیا تھا۔ عرب نیوز کے مطابق ساڑھے تین سال بعد قطر سے مصر جانے والی پہلی کمرشل پرواز پیر کو دوحہ ائیر پورٹ سے روانہ ہوئی ہے اس کے فوری بعد متحدہ عرب امارات میں شارجہ سے ائیرعربیہ کی پرواز دوحہ گئی۔ دوحہ سے قاہرہ کے لیے براہ راست پروازیں بحال ہونے سے قطر میں مقیم مصری باشندوں کے لیے سفرآسان ہو جائے گا۔ سرکاری اعداد وشمار کے مطابق تقریبا تین لاکھ مصری قطر میں مقیم ہیں۔ بحران کے دوران ان میں سے بہت سے لوگ اپنے گھر جانے سے قاصر تھے۔ سعودی عرب اور قطر کے درمیان براہ راست پروازیں گیارہ جنوری سے شروع ہوئی ہیں۔ سعودی عرب نے قطر کے ساتھ زمینی سرحد بھی کھول دی ہے۔