بھارتی گینگسٹرنے سلمان خان کو قتل کرنا زندگی کا مقصد بنا لیا، جیل سے پیغام بھیج دیا

(ویب ڈیسک)پنجابی سنگر سدھو موسے والا کو قتل کرنے والے گینگسٹر لارنس بشنوئی نے بالی ووڈ اداکار سلمان خان کے قتل کو زندگی کا مقصد بنا لیا ہے۔

تفصیلات کے مطابق لارنس بشنوئی نے جیل میں دیے گئے ایک انٹرویو میں  سلمان خان کو دھمکی دیتے ہوئے کہا کہ معافی مانگیں یا بُرے نتائج کا سامنا کرنے کیلئے تیار رہیں،  کیونکہ ان کی زندگی کا واحد مقصد سلمان خان کو قتل کرنا ہے۔

بھارتی پنجاب سے تعلق رکھنے والے گینگ کے لیڈر لارنس بشنوئی کا کہنا تھا کہ سلمان خان  کو مندر میں جا کر معافی مانگنی چاہیے،ابھی میں غنڈہ ’نہیں‘ ہوں مگر سلمان کو مارنے میں غنڈہ بن جاؤں گا،  میری زندگی کا مقصد سلمان کو مارنا ہے، سیکیورٹی  ہٹتے ہی انہیں قتل کر دوں گا۔

مذکورہ بالا انٹرویو میں بشنوئی نے یہ بھی انکشاف کیا کہ وہ سلمان کو چار پانچ سال سے مارنا چاہتے ہیں , بشنوئی نے سلمان خان کو مغرور بھی قرار دیا اور دعویٰ کیا کہ بھارتی پنجابی گلوکار سدھو موسے والا بھی سلمان خان جیسا ہی تھا, واضح رہے کہ اس سے قبل دیے گئے انٹرویو میں لارنس نے سلمان خان کو کالے ہرن کا شکار کرنے پر سخت تنقید کا نشانہ بنایا تھا اور عوام کے جذبات مجروح کرنے کا الزام عائد کیا تھا۔ گینگسٹر نے کہا تھا کہ معافی مانگیں ورنہ  نتائج کیلئے تیار رہیں۔ انہوں یہ بھی کہا تھا کہ بچپن کا غصہ ہے میرے اندر، آج نہیں تو کل اس کا غرور ضرور توڑوں گا۔