(24 نیوز)انڈین بیٹر ویرات کوہلی نے بھارتی فاسٹ باولر جسپریت بمرہ کو سب سے مشکل ترین باولر قرار دے دیا۔
آئی پی ایل کی ٹیم رائل چیلنجرز بنگلور کی جانب سے سوشل میڈیا پر ایک ویڈیو شیئر کی گئی جس میں کوہلی سے اس باولر کا نام پوچھا گیا جس کا سامنا کرتے ہوئے انہیں مشکلات کا سامنا رہا، اس سوال کے جواب میں کوہلی نے بھارتی فاسٹ باولر جسپریت بمراہ کا نام بتایا۔
آئی پی ایل میں رائل چیلنجرز بنگلور کی نمائندگی کرنے والے کوہلی نے مزید کہا کہ اس میں کوئی شک نہیں کہ جسپریت بمراہ کرکٹ کے تمام فارمیٹس میں دنیا کے بہترین باولر ہیں۔
کوہلی کا کہنا تھا کہ بمراہ نے انہیں آئی پی ایل میں ایک سے زائد مرتبہ آؤٹ کیا ہے، یہاں تک کہ نیٹ میں پریکٹس کے دوران بھی بمراہ کو کھیلتے ہوئے ایسا لگتا ہے کہ جیسے میچ چل رہا ہو، ہر گیند کھیلنا ایک چیلنج ہوتا ہے اور میں کہنا چاہوں گا کہ یہ سب سے مزیدار لیکن سخت چیلنج ہوتا ہے۔
خیال رہے کہ بمراہ آئی پی ایل میں ممبئی انڈینز کی نمائندگی کرتے ہیں اور انہوں نے آئی پی ایل میں اپنے پہلے ہی میچ میں اپنی پہلی وکٹ کوہلی کی حاصل کی تھی۔