ارشد چائے والا پاکستانی ہے یا نہیں؟ثابت کرنے کیلئے عدالت سے مہلت مانگ لی

(ویب ڈیسک)ارشد چائے والا کی شناختی دستاویزات بلاک ہونے کے خلاف پٹیشن پر عدالت نے مہلت دے دی۔

راولپنڈی ہائیکورٹ کے جسٹس جواد حسن نے ارشد خان المعروف ارشد چائے والا کی جانب سے شناختی کارڈ اور پاسپورٹ بلاک کیے جانے کے خلاف دائرپٹیشن پر سماعت کی،پٹیشن میں مؤقف اختیار کیا گیا کہ درخواست گزار کی شناختی دستاویزات بغیر کسی معقول وجہ کے بلاک کی گئی ہیں اور نادرا کی جانب سے 1978 سے قبل کے رہائشی شواہد طلب کیے جا رہے ہیں جوفراہم کرنا ممکن نہیں۔

سماعت کے دوران نادرا اور پاسپورٹ آفس حکام نے عدالت میں رپورٹ جمع کروائی، جس کے مطابق ارشد خان کی دستاویزات مصدقہ انٹیلی جنس اداروں کی رپورٹ کی بنیاد پر بلاک کی گئی ہیں،رپورٹ میں دعویٰ کیا گیا ہے کہ ارشد خان افغان شہری ہیں، اور حکومتی پالیسی کے تحت افغان باشندوں کو واپس ان کے ملک بھجوایا جا رہا ہے۔

ارشد خان کے وکیل نے عدالت سے جواب جمع کروانے کے لیے مہلت کی استدعا کی، جسے عدالت نے منظور کرتے ہوئے سماعت 22 اپریل تک ملتوی کر دی۔

 یہ بھی پڑھیں:بھارت کا 4 فٹ 8 انچ کا اداکار سلمان خان اور شاہ رُخ خان سے بھی آگے

یاد رہے کہ ارشد خان کو اسلام آباد کے ایک چائے کے ڈھابے پر کام کے دوران اپنی نیلی آنکھوں کی وجہ سے شہرت ملی تھی جو دیکھتے ہی دیکھتے وائرل ہوگئے اور اب برطانیہ میں ہوٹل کھول چکے ہیں۔